Муус устар 20 күнүгэр В.Г. Белинскэй аатынан куорат киин библиотекаҕа, кыраайы үөрэтэр салаатыгар «Уруһуйунан хоһуйуу» диэн олус интэриэһинэй кэпсэтии буолан ааста.
Айар куттаах, чараас эйгэнэн көрүүтүн ойуунан хоһуйан таһаарар дьикти кэрэ дьоҕурдаах, олоҕу ураты хараҕынан көрөр, улуу куйаары кытта ситимнээх Арыйаана - Анастасия Иванова биһиэхэ анаан ыалдьыттаата.
Тэрэһииҥҥэ уопсайа 27 ыалдьыт кыттыыны ыллылар.
Арыйаана бэйэтин уруһуйдарын дьон иннигэр туох суолталаахтарын, хайдах иэйии кэлэрин сиһилии кэпсээтэ, хомус алыптаах тыаһын таһааран, хоһоонунан түмүктээтэ. Тулалыыр эйгэни үөрэтии, бэйэ кыаҕын иһиллэнии, духуобунай сайдыы, олоҕу таптыырга, сыаналыырга кут үлэтэ барда диэтэххэ сыыспаппыт буолуо.
Мустубут дьон Арыйаана дьоҕурун көрөн-истэн, сөҕөн-махтайан, ирэ хоро кэпсэтэн, дуоһуйа сынньанан тарҕастылар.
Айылҕаттан айдарыылаахтар кинигэ выставкатын наһаа сэҥээрдилэр уонна ааҕааччы быһыытынан библиотекаҕа үөрэ-көтө суруттардылар.
Материалы бэлэмнээтэ Ольга Иванова
