Кулун тутар 17 күнүгэр В.Г. Белинскэй аатынан Кыраайы үөрэтэр библиотекаҕа «Горожанин» кулууп иһинэн ыытыллар тэрээһиҥҥэ саха норуодунай артыыһа Владимир Ильич Заболоцкай кэлэн ыалдьыттаан, бэрт истиҥ көрсүһүү буолан ааста. Саха эстрадатын бастакы көлүөнэ профессиональнай ырыаһыттарыттан биирдэстэрэ, эстраданы операны кытта дьүөрэлээбит артыыс, биллэр мелодист-ааптар Уус-Алдан улууһун уонна Лөгөй нэһилиэгин бочуоттаах олохтооҕо быйыл 70 сааһын туолла.
Бу үөрүүлээх тэрээһиҥҥэ Владимир Ильич кимтэн кииннээҕин, хантан хааннааҕын олоҥхо тылынан уустаан-ураннаан хоһуйан, Ньургун Боотур олоҥхону аҕата Илья Перевалов кэнниттэн 50 сыл буолан баран үрдүк сыанаҕа толорбутун иһитиннэрдэ, ааптар быһыытынан айбыт ырыаларын историятын сырдатта, эстрада киэҥ эйгэтигэр биһирэммит ырыаларыттан ыллаан, кэлбит ыалдьыттары сөхтөрдө. Көрсүһүү түмүгэр Владимир Заболоцкай айбыт ырыаларын хомуурунньуга таҕыстаҕына биһирэмин ыытыах буолан тарҕастыбыт.
В.Г. Белинскэй библиотека аатыттан өссө төгүл Владимир Ильиһы өрөгөйдөөх үбүлүөйгүнэн эҕэрдэлиибит. Баай ис хоһоонноох олоҕуҥ, дьонуҥ-сэргэҥ туһугар сыралаах үлэҥ-хамнаһыҥ ситиһиилээх буоллун, баҕа санааларыҥ туоллуннар! Чэгиэн-чэбдик сырыт, үүнэр ыччакка үүннээх-тэһииннээх үтүө тылгын иһитиннэрэ, сүбэ-ама, көмө-ньыма буола тур диэн алгыспытын аныыбыт!
Сиһилии тэрээһин туһунан сыанабылы билиһиннэрэбит.
Владимир Заболоцкай көрсүһүүтэ буоларын истэн баран, хайаан да барарга быһаарыммытым, мин кинини оҕо эрдэхпиттэн сэҥээрэр ырыаһытым, аан бастаан Чурапчы Одьулуунугар көрөн сөхпүтүм, туттан-хаптан өрө тэйэн тыыннаах эт куолаһынан ыраастык ыллаан олох уһулуччу этэ, атыттартан.
Бу Белинскай библиотекаҕа көрсүһүү наһаа истиҥ, иһирэх кэпсэтии буолла, устудьуон оҕолор сүрдээҕин сэргээн иһиттилэр, дьон ытыктабыла, бу суҥкэн киһини сөҕө, махтайа көрөллөрө, истэллэрэ кини айылҕаттан талааныгар сүгүрүйэллэрэ наһаа үөрдэр, ол курдук бэйэтин билсиһиннэрбитэ эмиэ ураты, дьонун туһунан кэпсээтэ, эдэр устудьуоннаабыт, гастролга сырыыларын, арааһынай буолбут тугэннэртэн быһа тардан кэпсээн, дэлби күллэрдэ, олоҥхоттон саҕалаан, эстраднай ырыаҕа тиийэ ыллаата. Бары да наһаа астынан тарҕастыбыт,хаартыскаҕа да түстүбүт.
Е.И. Куличкина.
Саха сирин народнай артыыһын наһаа сэргэх бэртээхэй Владимир Заблоцкайы кытта атах тэпсэн, сирэй көрсөн олорон, олоҕун айымньытын, үлэтин туһунан эт кулгаахпытынан истэн астынныбыт аҕай! Бирээминэ биэс ырыаны кытта Ньургун Боотур уонна Уот Уһутаакы партиятыттан быһа тардан олус күүстээх куолаһынан ыллаан доллоһутан кэбистэ. Култуура колледж оҕолоро тоҕуоруһан кэлэннэр сүрдээҕин сэҥээрдилэр. Биһиги Зоябыт биир дойдулааҕын бэккэ билэрин, куруук кини ситиһиититтэн үөрэрин киэн туттарын туһунан этэн туран Баай Байанай хартыынатын бэлэхтээтэ. Барҕа махтал көсүһүүнү тэрийбит Белинскэй аатынан библиотека эйэҕэс үлэһиттэригэр!
Үһүс көлүөнэ оскуолатын литературнай түмсүү чилиэннэрэ.
Бу ый 17 күнүгэр Бэлинскэй аатынан библиотека үлэһитэ Айталина Федоровна саха норуодунай артыыһа, эстрада, опера дэгиттэр ырыаһыта Владимир Ильич Заболоцкайы кытта «Горожанин» кулууп иһинэн бэттээхэй көрсүһүүнү тэрийэн ыытта. Владимир Ильич бэйэтин олоҥхо тылынан доллоһутан билиһиннэрэн тута интэриһи татта, сэргэхситтэ. Ийэтигэр истиҥ иһирэх таптала ырыатыгар көстөр «Ийэм хатыҥа» ырыатыгар Быйды эбэ ортотугар үгүс киһини сынньаппыт, сөрүүкэппит хатыҥ харахпар көстөн хаалла. Ньургун Боотур олоҥхоҕо Ньургун Боотур партиятын аҕата Илья Перевалов толоруутун 50 сыл буолан баран ыллаабытын киһи эрэ барыта билбэтэ буолуо. Айбыт ырыаларын тутан олорон истэр астыгыан.
Владимир Ильич 70 сааһын мүччү туппакка, ыҥыран кэпсэтиннэрэн, ыллатан кырдьаҕастары сэргэхситтилэр, эдэрдэргэ элбэҕи биллэрдилэр. Библиотека үлэһиттэригэр улахан махтал, бу курдук ырыаһыттары, үҥкүүһүттэри, суруйааччылары, уонна да атын идэлээхтэри ыҥыран көрсүһүүнү тэрийэн туспа сырдатыы, элбэҕи сонуну биллэрии буолар. Өссө да таһаарыылаахтык үлэлииргитигэр.
Үһүс күлүөнэ үөрэнээччитэ Зоя Константиновна Желобцова.
Айталина Прядезникова бэлэмнээтэ
