Айар куттаах Санникова Вера Афанасьевна - Мичийээнэ – суруйааччы, художниктар Международнай Федерацияларын Россиятааҕы Союhун чилиэнэ, Саха Ɵрөспүүбүлүкэтин норуотун маастара, Саха Ɵрөспүүбүлүкэтин культуратын туйгуна, «Айар Кут» хоhоонньуттар уонна кэпсээнньиттэр регионнааҕы Союhун чилиэнэ, үлэ ветерана.
«Маршал мааныылаах уола» ахтыы кинигэтин кэлэн Саха политехническэй оскуола 5б кылааhын оҕолоругар кэпсээн, билиhиннэрэн барда.
Вера Афанасьевна эбээтин бииргэ төрөөбүт быраата - Платонов Илья Николаевич сэриигэ туох ыарахаттары көрсүбүтүн, 7 мэтээллээх кэлбитин, Сталинтан 17 махтал сурук ылбытын сүрдээх үчүгэйдик кэлэн сырдатта.
Нажмите для увеличения
Вера Афанасьевна, Иван Семенович таайдарын Илья Николаевичтыын.
Платонов Илья Николаевич 1909 сыллаахха Чурапчы улууhун Хадаар нэhилиэгэр төрөөбүтэ. Кини бастакы ыҥырыынан от ыйыгар дойдутуттан Чурапчыттан уоттаах сэриигэ айаннаабыт, оччолорго кини 27 саастаах эбит. Олох биир кылаас үөрэгэ суох. Уоттаах сэрии саҕаланыаҕыттан бүтүөр диэри хорсуннук сэриилэспит. 6 сыл сэриилэспит: Аҕа дойду уонна Япония сэриитин кыттыылааҕа.
Сталинград анныттан саҕалаан Берлиҥҥэ диэри Украинаны, Румынияны, Венгрияны, Польшаны, Чехословакияны эт атаҕынан тилэри хаампыта. Сапер идэтинэн инники кирбиигэ сылдьан сэриилэспитэ. 5-с механизированнай корпус 39-с батальонун сэрииhитэ. Саха хорсун уола биир өлүүгэ сылдьар дьонугар сирдэрбэтэҕэ, киhи сиэринэн сылдьыбыта. Илья Николаевич лаппа кыанар, тулуурдаах, кытыгырас киhи буолан «Кыhыл сулус» III степеннээх уордьаннарынан уонна 6 бойобуой мэтээллэринэн наҕараадаламмыта.
Үүнэр көлүөнэ маннык хорсун, күүстээх санаалаах биир дойдулаахтарын истэннэр, киэн туттуохтара, холобур оностуохтара диэн эрэнэ хааллыбыт.
Туhаныллыбыт литература: Маршал маанылаах уола / Хомуйан оҥордулар : А.Д. Аммосов, В.А. Санникова. – Дьокуускай: ХИФУ издательскай дьиэтэ, 2013. – 58 с.
