Бибилэтиэкэҕэ олоҥхо
Размер шрифта:
Цвета сайта:
Шрифт:
Изображения:
Интервал между буквами (Кернинг):
Интервал между строками (Интерлиньяж):
Кнопка действия
Статья
05.05.2023

Бибилэтиэкэҕэ олоҥхо[12+]

Просмотры: 707

Муус устар 3 күнүгэр Дьокуускай куорат В.Г. Белинскэй аатынан кыраайы үөрэтэр бибилэтиэкэ дьиэтигэр Саха Өрөспүүбүлэкэтин үтүөлээх үлэһитэ, олоҥхо тыйаатырын артыыһа, олоҥхоһут Василина Баланова-Кэрэмэс Лыҥкыр Н.П.Бурнашев-Боодьоҕос «Кыыс Дэбилийэ» олоҥхотуттан быһа тардыыны толорон олоҥхону сэҥээрээччилэри кытары төрөөбүт күнүн көрүстэ.

Саха норуотун өркөн өйө, сылаас сырдык санаата, үрдүккэ, кэрэҕэ дьулуһуута, баҕарар баҕата түмүллүбүт тылынан уус-уран сүдү айымньыта буоларын биир чаас устата Кэрэмэс Лыҥкыр кэрэ куолаһынан оллоонноон олорон олоҥхолоон иһитиннэрдэ. Тэрээһиҥҥэ үөрүүтүн үллэстэ кэлбиттэр: тапталлаах ийэтэ Октябрина Семеновна, ытыктыыр уһуйааччыта Никандр Прокопьевич, аймахтара уонна олоҥхоҕо сүгүрүйээччилэр. Хас биирдии көрөөччү таптыыр артыыскатын, алгыстаах күнүнэн ис сүрэхтэриттэн эҕэрдэлээтилэр.

Василина Васильевнаҕа биир эйгэҕэ үлэлиир дьонун аатыттан эҕэрдэлээн туран сибэкки дьөрбөтүн уонна «Сата» театральнай бэстибээлгэ «Бастыҥ дьахтар оруола» диэн номинацияҕа хоппутун туоһулуур суругу уонна статуэтканы долгуйан туран Прокопий Владимирович туттарда.

Олоҥхо умсулҕаннаах кэрэ көрсүһүүтүгэр сахабыт тылын сүмэтигэр угуттанан кэрэ дорҕоон, тойук истэн, алгыс күүһүнэн ыраастанан дьон-сэргэ дуоһуйан астынан бардылар. Бу тэрээһин олоҥхобут инникилээҕин, кэскиллээҕин көрдөрдө. Инникитин да талааннаах биирдиилээн толорор олоҥхоһуттарбытын өйөөн ыччакка билиһиннэрэ, дьоҥҥо-сэргэҕэ угуйа туруохха!

Василина Васильевна, В.Г. Белинскэй библиотека аатыттан өссө төгүл төрөөбүт күҥҥүнэн итиитик-истиҥник эҕэрдэлиибит. Дьоллоох олоҕу, чэгиэн туругу, үрдүк ситиһиини баҕарабыт!.

 

Материалы бэлэмнээтэ Саргылана Колесова

Смотрите также