Статья | Кинигэ - олохпут кэрэһитэ

Кинигэ - олохпут кэрэһитэ. Кинигэтэ суох, ама, хайдах олоруохпутуй?

Мин Тома Никитина диэммин. 3 уол оҕолоох ийэбин, дьиэ хаһаайкатабын. 9 сыл дьиэҕэ оҕолорбун көрө олорор кэммэр, миэхэ күндү доҕорум – кинигэ этэ.

Оччолорго Е.О.Комаровскай «Начало жизни вашего ребенка» диэн кинигэтэ олохпор төһүү күүс-көмө буолбута. Оҕоҕо сыһыан, кинилэри иитии туһунан ааптар бэрт үчүгэй каналлаах, блогтаах. Кыра оҕолордоох дьоҥҥо олус туһалаах диэн бэлиэтиибин.

Хас биирдии ийэ декретка олорор кэмигэр, дьонтон тэйэр, атыттартан итэҕэстээх курдук сананара баар суол. Миэхэ эмиэ оннук этэ. Ол эрэн, ааҕыы эйгэтин билэн, кинигэни кытта ыкса доҕордоһон,  араас туһалаах информациялары  туһанан, билигин дьоҥҥо үтүө холобур буола сылдьабын да диэтэхпинэ, сыыспатым буолуо. Ити барыта кинигэ сабыдыала дии саныыбын.

Кырдьыктыы эттэххэ, оҕо сылдьан кинигэҕэ умсугуйбатах киһибин. Оннооҕор, оскуола программатын аймыньыларын толору аахпытым суох курдук. Онон билигин оҕолорбун  кыра  эрдэхтэриттэн кинигэ алыптаах эйгэтин билиэхтэрин баҕарабын. Ол туһугар хас өрөбүл аайы араас литератураны: остуоруйалары, кэпсээннэри, энциклопедиялары ааҕабыт. Билигин интэриэһиргииллэрэ аҕыйах да буоллар, кэлин улаатан истэхтэрин аайы күүһүрүө диэн эрэллээхпин. Саамай сүрүнэ, ылсыбыт дьыаланы тиһэҕэр тиэртэххэ, барыта табыллар аналлаах.  



Олохпун уларыппыт кинигэлэри билигин хараҕым харатын курдук харыстаан долбуурбар ууран турабын. Олохпор уларыйыы буолуон баҕардахпына, хайаан даҕаны ууруммут кинигэлэрбин ааҕабын. Оччотугар, ыйытыктарбар эппиэт булбут курдук сананабын.

Ол курдук бу кинигэлэри эһиэхэ сүбэлиэм этэ. Ааҕан баран, өйгүт - санааҕыт уларыйыа, толкуйгут да тоҕоостоох буолуо диэн эрэннэрэбин.

Ронда Берн «Сила»

Стив Харви «Поступай как женщина, думай как мужчина. Почему мужчины любят, но не женятся, и другие секреты сильного пола»

Бодо Шефер «Путь к финансовой свободе»

Хэл Элрод  «Магия утра. Как первый час дня определяет ваш успех»

Майкл Уити «Убеждай и побеждай! Гайд по безукоризненной риторике и железной логике»

Арсен Томский «InDriver: От Якутска до Кремниевой долины. История создания глобальной технологической компании»

Джордж Сэмюэль Клейсон «Самый богатый человек в Вавилоне»

Элиза Ликт «Оставь свой след. Как превратить мечту в дело жизни»

Хаартыска автор тус архыыбтарыттан туһанылынна

Материалы бэлэмнээтэ Ольга Тебенькова, библиотекарь