Ыам ыйа 5 күнүгэр Н.Д. Неустроев аатынан SMART-библиотекаҕа художниктар Международнай Федерацияларын Россиятааҕы Союһун чилиэнэ, Саха Өрөспүүбүлүкэтин норуотун маастара, Саха Өрөспүүбүлүкэтин культуратын туйгуна, "Айар Кут" хоһоонньуттар уонна кэпсээнньиттэр регионнааҕы Союзтарын чилиэнэ, үлэ ветерана Санникова Вера Афанасьевналыын көрсүһүү буолан ааста.
Кыайыы күнүн көрсө, Вера Афанасьевна абаҕатын туһунан Аҕа дойду сэриитин кыттыылааҕа Платонов Илья Николаевич, "Маршал мааныылаах уола" кинигэтин тула кэпсэтии буолла. Илья Николаевич олоҕун, хорсун быһыытын туһунан “Айыы Кыһатын” 5 кылаас үөрэнээччилэрэ кэлэн иһиттилэр, санааларын үллэһиннилэр. Үөрэнээччилэр хос эһээлэрин, эбээлэрин мөссүөннэрин илдьэ кэлбиттэрэ биһирэбиллээх.
Төрөөбүт дойдуга бэриниилээх буолуу, сэрии ыар тыына хас биирдии саха ыалын аймаабытын санаан аастыбыт. Вера Афанасьевна эбээтин бииргэ төрөөбүт быраата - Платонов Илья Николаевич сэриигэ туох ыарахаттары көрсүбүтүн, 7 мэтээллээх кэлбитин, Сталинтан 17 махтал сурук ылбытын, тулуурдаах, айылҕа оҕото буолан, араас моһоллору туораан, күүстээх, хорсун киhи буолан «Кыhыл сулус» III степеннээх уордьаннарынан уонна 6 бойобуой мэтээллэринэн наҕараадаламмытын кэпсээтэ, дьиэ кэргэн архивыттан хаартыскалары көрдөрдө. Бэйэтэ айбыт хоһоонун ааҕан долгутта.
Санникова Вера Афанасьевна - Мичийээнэ, Мэҥэ- Хаҥалас улууһун, Майа нэһилиэгэр 1961с. төрөөбүтэ. Идэтинэн художник-мастер. Бары өттүнэн талааннаах киһи буолан, айар үлэтин 2013 сылтан саҕалаабыта. Ити сыл абаҕатын Платонов Илья Николаевич туһунан ахтыыта "Маршал маанылаах уола" диэн кинигэ буолан тахсыбыта. 2015 сылтан хоһоон суруйуутунан дьарыктаммыта.
2017 с. "Айар ыллыгым устунан устунан" кэпсээннэрэ, хоһоонноро, түбэлтэлэрэ тахсыбыта.
2021 с. "Тепло души и рук" каталог кинигэтэ бэчээттэммитэ.
2022 с. "Айар кутум оһуордара" кинигэтэ тахсыбыта. 20 тахса хоһоон, ахтыы хомурунньугар киирбит айымньылаах.
Кэпсээннэрэ, хоһоонноро республика араас хаһыаттарыгар бэчээттэнэллэр, биэс хоһооно ырыа буолан ыллана сылдьар.
Вера Афанасьевнаҕа олус интэриэһинэй, туһалаах, элбэҕи толкуйдатар, олоҕу сыаналыырга үөрэтэр кэпсээнигэр махтанабыт.
Материал подготовила: ведущий библиотекарь, Беленкова М. В.
