В этом году Центральная городская библиотека «SMART-библиотека им. Н.Д. Неустроева» начала сотрудничество с коллекционерским клубом «Умсулҕан» из Усть-Алданского улуса. Выставка коллекционеров в библиотеке — это событие, на котором можно увидеть предметы коллекционирования, собранные многими людьми. Такие выставки призваны познакомить посетителей с разными видами коллекционирования.
Быйыл сайын Н.Д. Неустроев аатынан Smart-библиотека Уус Алдан улууһун «Умсулҕан» коллекционердар кулууптарын кытта үлэтин саҕалаата. Уус Алдан киинигэр Бороҕоҥҥо 1994 сыллаахха, оччолорго «Мүрү саһарҕата» хаһыат журналистара Галина Бочкарева, Петр Павлов уонна оҕо музыкальнай оскуолатын учуутала Станислав Луковцев көҕүлээһиннэринэн коллекционердар түмсүүлэрэ тэриллибит. Араас саастаах, идэлээх, ол эрээри биир өйдөөх-санаалаах, биир интириэстээх дьон, коллекцияны мунньааччылар, түмсэн «Умсулҕан» диэн ааттаммыттар. Общественнай түмсүү диэтэххэ, кырдьык да, бэйэлэрин дьарыктарыгар бэриниилээх уонна туруоруммут соруктарын ситиһэр дьон бу кэм устата элбэх үлэни ыытан кэлбиттэр.
Ол курдук, коллекционердарбытын кытта билсиэҕиҥ:
Сивцева Елизавета Федоровна – СР үөрэҕириитин үтүөлээх үлэһитэ, Уус-Алдан улууһун Өспөх нэһилиэгин олохтооҕо. Елизавета Федоровна олус кэрэ, хатыламмат араас, дьикти кинигэ закладкаларын коллекциятын туруорда. Хас биирдии закладката туһунан историялаах. Закладка арааһа олус элбэх эбит, араас материаллартан оҥоһуллубуттар. Элбэх ааҕааччы сэҥээриитин ылла.
Москвитина Матрена Семеновна – Уус Алдан улууһун Бочуоттаах олохтооҕо, үлэ бэтэрээнэ, сэрии сылын оҕото. Матрена Семеновна саха норуотун культуратын, историятын, фольклорун үөрэтээччи. Кини туоруорбут «Өбүгэ үгэһэ үйэлэргэ» коллекцията олоҥхо тематыгар анаммыт. Хас биирдии муспут кинигэтэ суруйааччы илии батааһыннаах, баҕа санаалаах. Олоҥхону толорооччулары, чинчийээччилэри кытта тэҥҥэ сылдьан үлэлэһэр киһи.
Жиркова Анастасия Федоровна – 1-гы №-дээх Мүрү орто оскуолатын үрдүк категориялаах фельдшерэ, СР доруобуйа харыстабылын туйгуна. Анастасия Федоровна доруобуйа харыстабылыгар сыһыаннаах олус интириэһинэй салааны «Коллекция советских медицинских оборудований» уонна муспут значоктарын быыстапкатын туруорда. Элбэх дьон сөҕө көрдүлэр, аҕа саастаах ааҕааччылар урукку кэмнэрин санаан, кэпсээн бөҕө буолбуттара.
Бочкарева Раиса Васильевна бииртэн биир кэрэ көстүүлээх, төрүт хатыламмат, араас быһыылаах-таһаалаах «Прекрасные слоны» коллекциятын быыстапкатын туруорда. Кыра оҕо, улахан дьон болҕомтотун олус тарта. Барыта холбоон 100-тахса фигуркалаах.
Иванова Мария Андреевна сэбиэскэй кэминээҕи кырачаан маллары-саллары, радиеприемниктары, кырачаан кинигэлэри муспутун «Минималистика» диэн ааттаан коллекциятын уурда. Ону таһынан сылабаар арааһын хомуйбутун дьон дьүүлүгэр таһаарда, оҕолуун-уруулуун олус сэргии көрдүлэр.
Маннык коллекционердар быыстапкалара библиотекаҕа туруулара үгүс көрөөччүнү, ааҕаччыны тардар, угуйа ыҥырар. Коллекционердар наһаа үлэһит, кэрэни көрө үөрэммит, историяны билэр, үөрэтэр, хасыһар дьон эбит.
Онон, биһиги библиотекабытыгар эдэрдиин-эмэнниин, оҕолуун-уруулуун кэлиҥ, сылдьыҥ, саҥаны билиҥ, кэрэни көрүҥ, ааспыт кэмҥэ түһэн, урукку кэмҥэ эргиллэн ылыҥ диэн ыҥырабыт!
