Олунньу 10-20 күннэригэр Тулагы-Киллэм нэһилиэгэр ийэ тыл, сурук-бичик күнүн чэрчитинэн декада ааста. Ол курдук олунньу 14 күнүгэр Тулагы-Киллэм нэһилиэгэр биир суолталаах тэрээһин буолан ааста! М.П. Обутова-Эверстова аатынан культурабыт киинигэр 4-с төгүлүн Нэһилиэк сахалыы дьыктаана күргүөмүнэн суруйуу акция ыытылынна.
Сыала-соруга: кыратыттан улахан дьоҥҥо тиийэ сахалыы сайаҕастык саҥаран, ааҕан, суруйан истиҥник этинэр ийэ тылбыт үйэлэргэ сүппэккэ үүнэ-сайда, эдэр ыччаппыт ийэ тылын харыстыыр, сайыннарар суолтатын умнубатын диэн.
Бэлиэтиэхпитин баҕарабыт сылын аайы ыытар тэрийээччилэрбитин, саха киһитэ сайдарыгар улахан болҕомтону уурар тэрилтэлэргэ: Тулагы-Киллэм нэһилиэгин олохтоох дьаһалтата, П.И.Кочнев аатынан орто оскуолата, М.П. Обутова-Эверстова аатынан культура киинэ уонна А.Я.Уваровскай аатынан олохтоох библиотекалар.Үгэс буолбут тэрээһиҥҥэ араас дьарыктаах исписэлиистэр, оҕолор, аҕам саастаах дьон, устудьуоннар кыттыыны ыллылар.Сахалыы дьыктаан саха литературатын төрүттээбит суруйааччылартан биирдэстэрэ, драматург, прозаик, поэт Анемподист Иванович Софронов «Куоратчыт» кэпсээниттэн быһа тардыыны аахта, суруйтарда саха тылын учуутала Афанасьева Наталия Афанасьевна.
«Саха сирин норуоттарын литератураларын төрүттээччилэр» диэн ааттаах кинигэ выставката киэҥ саалаҕа турда, кэпсээтэ, сырдатта: ол курдук, Өксөкүлээх Өлөксөй, Ойуунускай, Алампа, Неустроев Н.Д. айымньылара кэнэҕэски сайдар суолу ыйбыт, саханы саха дэтэр, саха толкуйа, мындыра буоларын бэлиэтиир улуу суруйааччыларбыт.
Улахан махталбытын биллэрэбит олохтоох администрацияҕа (салайааччы Попов Егор Гаврильевич-сүрүн спонсорбытыгар), культурабыт киинин үлэһиттэригэр (директор Игнатьев Максим Пантелеймонович, сырдык, сылаас сааланы бэлэмнээн, кыттааччылары үөрэ көрсөн), орто оскуола учууталларыгар (директор Дьяконов Николай Викторович , үтүө санаалаах, куруук көмөҕө бэлэм), нэһилиэкпит киэн туттар, үтүө санаалаах, өйүүр, көмөлөһөр депутаппытыгар, сүрүн спонсорбытыгар-Оконешников Яков Тимофеевичка уонна кэлэн сахалыы дьыктааҥҥа кыттыыны ылбыт, суруйбут нэһилиэк олохтоохторугар, ааҕааччыларбытыгар, оҕолорго, ыччакка. Махтанабыт Дьүүллүүр сүбэҕэ, үлэлэри бэрэбиэркэлээбит учууталларбытыгар: Афанасьева Н.А., Сидорова А.С., Кузьмина Н.Д., Григорьева Ю.М., Наумова В.Д., Колесова Т.Б., Прибылых В.Г., Уваровская Л.Г., Осипова В. Н. Эҕэрдэбитин тиэрдэбит кыайыылаахтарга, анал аат ылбыттарга, өссө үрдүк ситиһиилэри баҕарабыт. Ону таһынан, библиотека иһинэн саха киһитэ сөбүлээн оонньуур остуол оонньуулара буолан аастылар. Ааҕаччылар үөрэ-көтө бириэмэлэрин туһалаахтык атаардылар, дьарыктаннылар, сайыннылар.
«Ийэ тылбыт үүнэ-сайда тур» диэн ааттаах өссө биир киэҥ тэрээһин буолан ааста «Алгыс» Сырдаахтааҕы кулуупка. Оҕо-аймах тоҕуоруһан-мустан чуор куоластарынан хоһоон ааҕан дьүллүүр сүбэҕэ иһитиннэрдилэр. Олус үөрэн, өрө күүрүүлээхтик араас айымньылартан талан, салайааччылара бэлэмнээн, көхтөөхтүк кытыннылар. Ити курдук, культура уонна сомоҕолоһуу сылыгар биир ситим буоламмыт, баай ис хоһоонноох саха тыла куруук баар буоллун, көлүөнэттэн көлүөнэҕэ бэриллэ турдун диэн баҕа санаабытын тиэрдэбит. Саха норуота киэн туттар, саха омук тыла сайдарыгар олук уурбут суруйааччыларбытыгар сүгүрүйэбит. Кинилэр биһиэхэ анаан хаалларбыт айымньыларын ааҕан баран киһи ис туруга, санаата - оноото тиллэн кэлэр уонна оннук төрүттээх, силистээх-мутуктаах эбиппин диэн санаа уһуктар, көмүскэллээх буоларын өйдүүр.
