Ийэ тыл, сурук-бичик күнүн көрсө уонна Саха сиригэр култуура сыла биллэриллибитин чэрчитинэн олунньу 12 күнүгэр Заложнай библиотекаҕа Саха эстрадатын сулуһа, СӨ үтүөлээх артыыһа Аскалон Николаевич Павлов дьиэ кэргэнин илдьэ ыалдьыттаата. Кини саха эстрадатыгар дьиҥ саха эр киһитин уобараһын биэрэр аксакал ырыаһыппыт буолар. Көрсүһүү төрөөбүт тыл сайдарын, харыстанарын туһунан буолла.
Дьиэ кэргэнин билиһиннэрэн, айар үлэтин туһунан кэпсээн төрүт тылбыт билиҥҥи кэмҥэ туругун туһунан санаатын үллэһиннэ. Уонна улахан кэпсэтии дьиэ кэргэҥҥэ төрөөбүт тылы иҥэрии тула буолла. Аскалон Павлов саха дьонугар-сэргэтигэр бөлүһүөктүү ис хоһоонноох ырыаларынан биллэр. «Биһиги дьиэ кэргэн оҕолорбутун сахалыы саҥардарга дьулуһабыт. Оҕо ханнык тылынан саҥарара төрөппүттэртэн улахан тутулуктаах» диэн этэр кини. Төрөөбүт тылбытын харыстааһын кэлэр көлүөнэҕэ ыраас дьиҥнээх саха тылын тиэрдии туһунан дириҥ ис хоьоонноох кэпсэтии буолла. Саха эстрадатын үлэтин хамнаһын Аскалон Николаевич кылгастык сырдаппытын ыалдьыттар сэҥээрэн иһиттилэр.
Ыстатыйаны бэлэмнээтэ: Любовь Скрябина
