Бүгүн биһиги «Маяк» библиотекабыт иһинэн үлэлиир «Книгини» кулууп кыттыылаахтара төрөөбүт тыл күнүн көрсө «Сылаас саха тылынан» диэн көрсүһүү ыыттыбыт. Ыалдьыппыт - филология билимин хандьытаата, литературовед Елена Афанасьевна Архипова. Төрөөбүт ийэ тылбытынан истиҥник-иһирэхтик кэпсэттибит, көрсүһүүнү Елена Афанасьевна саха норуотун таптыыр поэттарын хоһооннорун ааҕыыттан саҕалаата, биһигини барыбытын олус долгутта. Сахабыт тыла сүрэхпитигэр сайан киирдэ, дууһабыт кылын таарыйда.
САХА САҤАТА
Эппэр ийэм үүтүн кытта
Иҥмит эбит, быһыыта,
Кустук өҥнөөх,
Кымыс сыттаах
Сахам мандаар саҥата.
Кини миигин
Таптыыр, ыллыыр
Тыыннаах, сырдык дууһалыыр,
Кини миигин кырыыр, алгыыр
Эрдээх, хоһуун санаалыыр.
Кини миэнэ-Барҕа баайым,
Өлбөт мэҥэм-мин дьолум.
Кини-миэнэ
Ыалдьар ыарыым,
Үлэм, күнүм-мин соргум.
Кэмниин тэҥҥэ,
Дьоммун кытта
Кэхтибэккэ сайдыахтын
Кустук өҥнөөх,
Кымыс сыттаах
Сахам аптаах саҥата.
(Семен Данилов)
Семен Данилов, Иван Гоголев-Кындыл, Иван Мигалкин биһигинниин сылаас сахабыт тылынан «кэпсэттилэр», уйаҕас лирикаларынан тылбытын таптыырга, харыстыырга, саха буоларбытынан киэн туттарга ыҥырдылар.
Ыалдьыппыт поэттар хоһооннорун иэйиилээхтик ааҕан биһигини литература хонуутугар сиэтэн киллэрдэ. Биллэр суруйааччыларбытын Өксөкүлээх Өлөксөйү, Алампаны, Былатыан Ойуунускайы, Иван Арбитаны, Николай Якутскайы, Егор Неймоховы ахтан-санаан аастыбыт.
Сахабыт уус-уран тыла умсугутуулааҕын, кэрэ музыка курдук сүрэххэ кутуллан киирэрин астына иһиттибит.
Көрсүһүү иккис чааһыгар ыалдьыппыт соҕотох оҕотун Гелена Платонова туһунан суруйбут кинигэтин билиһиннэрдэ уонна биһиги библиотекабытыгар бэлэх уунна. Кинигэ суруллубут историятын, Гелена айымньыларын билиһиннэрдэ. Талааннаах эдэр ааптар туһунан биллибит, айымньыларын аахтыбыт.
Дьиэ кэргэҥҥэ ааҕыы култуурата хайдах үөскүүрүн, айар үлэ абылаҥын туһунан санааларын үллэһиннэ, сүбэ-соргу биэрдэ.
Бүгүн көрсүһүүгэ сылдьыбыттары хас биирдиибитин төрөөбүт тылбыт кэрэтин, этигэнин, имигэһин туһунан санаа атастаһыы барыбытын сомоҕолоото, бу кэпсэтии дириҥин, олус суолталааҕын өйдөттө, иэйиибит уһугунна, хайдах эрэ чэпчээбиккэ, ырааһырбыкка, туох эрэ олус кэрэҕэ, сырдыкка сылдьыбыттыы сананан үөрэн-көтөн тарҕастыбыт.
Ис сүрэхтэн өйдөөтүбүт - сахабыт тыла төрөппүт ийэбит курдук күндүтүн, сылааһын, кэрэтин!
Маннык көрсүһүүлэр өйбүтүн-санаабытын, дууһабытын байыталлар, ырааһынан толороллор эбит. Үгүс ыччат төрүттэрин умна быһыытыйан, булкаас аҥардаах буолбут кэммитигэр биһиги ураты култуурабытын харыстыырбыт, сайыннарарбыт наадалааҕын бигэтик билэн, өйдөөн күүспүтүгэр күүс, сэниэ киирбиккэ дылы буолла. Ийэ тылбыт оннук аптаах эбит.
Көрсүһүүттэн угуттанан, кулууп чилиэннэрэ саҥа санаалаах, мичээр аргыстаах, харахпыт аһыллан тарҕастыбыт.
Истиҥ кэпсэтии иһин
ыалдьыппытыгар, саха тылын, литературатын, култууратын ахсаабат пропагандиһыгар
Елена Афанасьевна Архиповаҕа дириҥ махталбытын тиэрдэбит. Гелена Платонова
туһунан «Кыыс Аанньал» диэн кинигэ бэйэтин ааҕааччыларын булуо диэн эрэнэбит.
