«Сахалыы дьыктаан» түмүгэ билиннэ.
Олунньу 18 күнүгэр Н.Д. Неустроев аатынан Дьокуускай куорат киин библиотекатыгар Төрөөбүт тыл уонна сурук-бичик күнүн чэрчитинэн сахалыы таба суруйуу үөрүйэҕин олохсутар, иҥэрэр сыаллаах «Сахалыы дьыктаан» аахсыйа буолан ааста. Дьыктааны суруйууга ким баҕалаах кыттыыны ыллылар.
Быйлгы дьыктаан тиэкиһэ Таатта талыы сириттэн тардыылаах, Саха Республикатын народнай суруйааччыта, дэгиттэр талааннаах прозаик, драматург, Чөркөөхтөөҕү полит-сыылка музейын, Саха сирэ нуучча государствотыгар холбоспут кэмин көрдөрөр «Доҕордоһуу» уонна Ытык Күөлгэ Хадаайытааҕы музейдары тэрийээччитэ, оҕо эрдэхпититтэн хас биирдиибит таптыыр суруйааччыбыт Дмитрий Кононович Сивцев-Суорун Омоллоон оҕолорго анаан суруйбут биир биллэр «Чүөчээски» кэпсээниттэн быһа тардыыны аахтыбыт, иһиттибит. Кыттаачылар кэпсэтиигэ, ырытыһыыга кыттыһан оскуолатааҕы сылларын саамай күндү кэмнэрин ахтан-санаан аастылар.
Дьыктааны биллэр суруналыыс, «Саха» НКИХ «Эйгэ-Культура» биэрии ыытааччыта, «Тооку» оҕо ханаалын редактора Анна Васильева олус бэркэ аахта. Оо, алаас барахсан, оҕолор айылҕаҕа тапталларын иһийэн иһиттибит, долгуйан ыллыбыт.
Дьыктаан түмүгүнэн, «Бастыҥ суруксут» (5 сыана) анал ааты ыллылар: Маргарита Кузьмина, Анастасия Созонова, Сайаана Заровняева, Екатерина Антонова, Виктория Самойлова, Елена Сантаева, Ньургуйаана Наумова, Мария Иванова, Марфа Толстоухова ыллылар. «Бастыҥтан бастыҥ суруксут» анал аат хаһаайката Алина Иванова буолла.
Сити курдук сонун тэрээһин сыалын ситэн, бары астынан, өссө да көрсүөх буолан тарҕастыбыт.
