Олунньу 13 күнүгэр Тулагы-Киллэм П.И. Кочнев аатынан орто оскуолатыгар үрдүкү кылаас оҕолоругар төрөөбүт тыл, сурук-бичик күнүгэр анаан XII төгүлүн ыытыллар Республиканскай акция «Сахалыы дьыктаан» икки аудиториянан буолла.
8 «а» кылаас оҕолоругар (салайааччы Сидорова А.С.) Дьыктааны суруйтарда Саха культуратын туйгуна, Россия уонна Саха сирин суруйааччыларын союһун чилиэнэ, поэт, «Сулустар ыҥыра көрөллөр», «Хаҥыл санаа хааһаҕа», «Халлаан устун суос сатыы», «Дьол баар» кинигэлэр ааптардара - Елизавета Ивановна Мигалкина. Иккис аудиторияҕа 9 «а», «б» кылаастарга (салайааччы Афанасьева Н.А.) Дьыктааны аахта Александра Васильевна Филиппова, Тулагытааҕы А.Я.Уваровскай аатынан библиотека сэбиэдиссэйэ. Ону таһынан ийэ тыл, сурук-бичик күнүн чэрчитинэн Елизавета Ивановнаны кытта улахан сүһүөх кылаас оҕолоро, учууталлара истиҥ иһирэх көрсүһүүтэ буолла. Поэт автограф-сессия ыытта, дууһаны манньытар хомоҕой хоһооннорун ааҕан иһитиннэрдэ, оҕолору кытта санаа атастаһан сүбэ-ама биэрдэ. Төрөөбүт төрүт тылбытын өрө тутан, суолтатын сүтэримиэҕин, умнумуоҕун кэлэр кэнэҕэски ыччаттарбытыгар тиэрдиэҕин диэн.
Бүгүҥҥү үөрүүлээх, төрөөбүт төрүт тылбыт бэлиэ күнүгэр кыттыыны ылбыт, тэрийсибит күндү дьоммутугар улахан махталбытын биллэрэбит, чуолаан биһиги ыҥырыылаах ыалдьыппытыгар Мигалкина Елизавета Ивановнаҕа, учууталларбытыгар - Сидорова Августа Семеновнаҕа, Афанасьева Наталия Афанасьевнаҕа, Кузьмина Наталья Дмитриевнаҕа, барыгытыгар үрдүк ситиһиилэри баҕарабыт.
Төрөөбүт тылбыт баайа, эгэлгэтэ, сүмэтэ хас биирдиибитигэр арыллан истин, ийэ тылынан санаатын сайа этэр ыччат дьон ахсаана хаҥыы турдун баҕа санаабытын тиэрдэбит.
