Олунньу 13 күнэ Саха сирин үрдүнэн төрөөбүт тыл уонна сурук-бичик күнэ.
Бу күн 1996 сыл Саха Өрөспүүбүлүкэтин бастакы бэрисидьиэнэ Михаил Ефимович Николаев ыйааҕынан саха норуотун улуу сырдатааччыта, талааннаах лингвист Семен Андреевич Новгородов төрөөбүт күнэ «Төрөөбүт тыл, сурук-бичик күнүнэн» биллэриллибитэ.
2014 сылтан үгэскэ кубулуйбут Өрөспүүбүлүкэ үрдүнэн Хотугулуу-Илиҥҥи бэдэрээлинэй үнүбүрсүтүөт уонна Саха Өрөспүүбүлүкэтин Национальнай бибилэтиэкэтэ тэрийэн ыытар сахалыы дьыктааны суруйуу аахсыйа В. Г. Белинскэй аатынан Кыраайы үөрэтэр бибилэтиэкэҕэ буолан ааста.
Дьыктаан ыытыллар сыала-соруга: саха тыла киэҥ эйгэҕэ-билимҥэ, култуураҕа, үөрэхтээһиҥҥэ, дьыала-куолу тылыгар, үлэ араас салаааларыгар, тэрилтэлэргэ туттуллар, сайдыбыт истииллэрдээх, олоҕурбут нуормалаах судаарыстыба тыла буолар. Таба суруйуу литэрэтиирэ, сурук-бичик тылын нуорматын биир суолталаах салаата. Бу тэрээһин оскуола оҕотуттан саҕалаан улахан дьоҥҥо тиийэ табатык суруйууну уонна төрөөбүт төрүт тыл кыһалҕаларыгар уопсастыба араас араҥатын болҕомтотун тардар сыаллаах ыытыллар.
Быйылгы дьыктаан, Саха Өрөспүүбүлүкэтин норуодунай суруйааччыта, СССР, Саха Өрөспүүбүлүкэтин уонна Арассыыйа сойуустарын чилиэнэ, Социалистическай Үлэ Геройа, Саха АССР искусствотын үтүөлээх деятелэ, Саха Өрөспүүбүлүкэтин Академиятын академига, Дьокуускай куорат бочуоттаах олохтооҕо, прозаик, поэт, драматург Дмитрий Кононович Сивцев – Суорун Омоллоон «Чүөчээски» диэн кэпсээниттэн суруйуу буолла.
«Чүөчээски» диэн айымньыттан быһа тардан, 206 тылтан, 15 этииттэн турар тыллаах тиэкиһи, Саха Өрөспүүбүлүкэтин ыччат бэлиитикэтин туйгуна, Саха көрдөрөр- иһитиннэрэр ханаалын «Тэтим саха араадьыйатын» редактора, «Саҥа күн» биэрии ыытааччыта, Арассыыйа журналистарын сойууһун чилиэнэ Ньургуйаана Васильевна Ботуева аахта.
Дьыктааны В.А. Вонгродскай аатынан Дьокуускайдааҕы медицинскэй колледж устудьуоннара уонна бары баҕалаахтар суруйдулар. Бу колледж бибилэтиэкэрэ Екатерина Егоровна Томская, педагог-иитээччитэ Екатерина Семеновна Егасова бибилэтиэкэ тэрээһиннэригэр устудьуоннары көхтөөхтүк кытыннаралларын, тэҥҥэ үлэлэһэллэрин бэлиэтээн, махтал тылларын кинилэргэ тиэрдэбит.
Дьыктааны бэрэбиэркэлээһини кылаабынай дьүүллүүр сүбэ быһыытынан Дьокуускай куорат 23 №-дээх оскуолатын саха тылын уонна литературатын учуутала Гаврильева Вера Святославовна сыаналыаҕа.
Бары кыттыбыт дьоҥҥо барҕа махтал. Дьыктаан түмүгүн таһаарыы үөрүүлээх быһыыга-майгыга олунньу 18 күнүгэр туспа тэрээһин быһыытынан ыытыллыаҕа.
