Ийэ тылбыт баар - бараммат баай. Олунньу 11 күнүгэр Тулагы-Киллэм нэһилиэгэр төрөөбүт тыл, сурук -бичик күнүгэр аналлаах бэрт тэрээһин буолан ааста. Ол курдук, иккис төгүлүн ыытыллар «Нэһилиэк дьыктаана» олохтоох дьаһалта, М.П.Обутова-Эверстова аатынан култуура киинэ, А.Я.Уваровскай аатынан библиотека, П.И.Кочнев аатынан орто оскуола тэрээһиннэринэн ыытылынна. Санатан эттэххэ, нэһилиэккэ «Сахалыы дьыктаан» 2018 сылтан ыытыллар. Оччолорго «Ньургуһун» библиотека сүрүннээн ыытар этэ, тиэкиһин Национальнай библиотека бэлэмниирэ. Быйылгы тиэкиhи буоларын курдук саха тылын, литературатын учуутала Н.А.Афанасьева Николай Золотарев-Якутскай «Төлкө» айымньытыттан ылан, бэлэмнээн аахта. Экспертар бэлиэтээһиннэринэн бүгүҥҥү дьыктааҥҥа кыттыбыт дьон бары үчүгэйдик суруйбуттар, чахчы даҕаны сахалыы суруйар дьоҕурдарын көрдөрбүттэр. Бэрэбиэркэлээһин кэнниттэн түмүк оҥордулар, наҕараадалааһын буолла, анал ааттар туттарылыннылар. Ол курдук, «Алгыстаах тыл» аат иҥэрилиннэ В.Д. Наумоваҕа, «Ийэ тыл кэскилэ» туттарыллынна В.Н.Поповаҕа, «Удьуор утума» диэн ааты ыллылар А.А., А.В. Атласовтар дьиэ кэргэн уонна «Үчүгэй суруксут» дипломунан наҕараадаланна С.Ю. Гуляева-Тихонова. Түмүккэ, муҥутуур кыайыылааҕынан педагогическай үлэ бэтэрээнэ Светлана Пантелеймоновна Шарина буолла, киниэхэ ытыс тыаһын доҕуһуолунан «Мэҥэ сурук» туттарылынна. Ону таһынан бүгүҥҥү тэрээһин күндү ыалдьыттара эмиэ кыттыһан, бэйэлэрин санааларын этэн, бириис туттардылар. В.Н. Луковцев, СӨ суруйааччыларын сойууһун чилиэнэ, публицист олоххо активнай позициялаах, үлэ бэтэрээнэ Галина Николаевна Сидороваҕа бэйэтин бэлэҕин туттарда. Гордума депутата Я.Т. Оконешников эҕэрдэлэргэ кыттыһан туран, саамай эдэр, кэскиллээх суруйааччыга Соловьева Олеся5а кинигэ бэлэх уунна.
Сахабыт тылын үйэтитиспит, биир дойдулаахпыт А.Я.Уваровскай этиитинэн ааттаммыт кинигэ быыстапка турда: «Мин билигин үөрэбин таптыыр Сахам тылынан маҥнайгы суругу мин суруйбуппуттан». Өссө биири бэлиэтээн аһарыахпытын баҕарабыт – С.А.Новгородов аатынан «Айар» национальнай кинигэ кыһата бэйэтин продукциятын атыыга аҕалан, дьон сэҥээриитин ылла. Ону таһынан А.Я.Уваровскай аатынан библиотекаҕа араас кинигэ эгэлгэтин бэлэх уунна! Ааспыт сыл түмүгүнэн «Айар» компания бэлиэтээһининэн Дьокуускай куораттаа5ы кииннэммит библиотечнай ситим «Лучший партнёр: популяризатор чтения» буолла уонна 20.000 солк. сертификат тутта!
Дьыктаан суруйсубут кыттыылаах, Тулагы-Киллэм төрүт олохтооҕо Сидорова Галина Николаевна бэйэтин санаатын үллэһиннэ:
«Олунньу ый 11 күнүгэр сыл аайы буоларын курдук сахалыы дьыктаан суруйдубут. Былырыын 96 киһи кыттан суруйбут буоллахтарына, быйыл 42 киһи бэйэлэрин тургутан көрдүлэр. Бастакы дьыктааны Тулагытааҕы библиотека үлэһиттэрэ 2018с. саҕалаабыттара. Библиотекаҕа суруйтараллар этэ. Онтон 2023с. нэһилиэккэ баар түөлбэлэр кыттаннар элбэх киһи күргүөмнээхтик кэлбиттэрэ. Манна кыттыыны ыллылар араас идэлээх үлэһиттэр, нэһилиэк олохтоохторо уонна бэтэрээннэр. Бэтэрээннэри Федотова Л.С., (бэтэрээннэр сэбиэтин бэрэссэдээтэлэ) кытталларыгар транспорынан хааччыйда. Дьыктаан Н.Якутскай суруйбут «Төлкө» романыттан быһа тардыы. Тиэкис ааҕыытын оскуола саха тылын учуутала Афанасьева Н.А. намыын наҕыл куолаһынан аахта. Суруллубут дьыктааны библиотека улэһиттэрэ, оскуола учууталлара бэрэбиэркэлээн, тэрээһиннээхтик үлэлээн бырыһыаҥҥа таһаардылар. Олох үчүгэй көрдөрүүлээх кыайыылаах бэтэрээн учуутал Шарина С.П.буолан, «Көмүлүөк» иһитин бэлэх тутта. «Ийэ тыл кэскилэ» аат Попова В.Н. буолан, бэтэрээннэр үөрүүлэрэ үгүс.
«Кэм кэрэһиттэрэ» диэн кинигэ ааптара, бэйэтэ суруйбут кинигэтин ахтыыбынай кыттааччыга бэлэх уунна. Бу тэрээһиҥҥэ кэлэн кыттыыны ылла, көрдө-иһиттэ ытыктабыллаах публицист, билиҥҥи бириэмэ бэлиэ, биһирэмнээх дьоннорун сырдатан, устуоруйа уруоктарын умнубат буоларга суруйар Валерий Николаевич Луковцев - Дьурустаан ыалдьыттаата. Ситэри санаабын этиим. Төрөөбүт төрүт тылбыт симэлийбэтин туһугар, бүтүн нэһилиэгинэн ылсан үлэлиэххэ наада диэн түмүккэ кэллим. Саха норуодунай суруйааччыта Сайа эппитэ: «Хас биирдии Ийэ, Аҕа, Эһээ, Эбээ дьиэтин иһигэр ыраастык сахалыы саҥаран оҕолорун, сиэннэрин кытта кэпсэтэн сырыттаҕына, төрөөбүт тылларынан дьону кытта кэпсэтэ үөрэттэхтэринэ, улахан государственнай таһымнаах үлэни оҥороллор. Ханнык баҕарар тэрээһин, холобур бу дьыктаан суруйуутун ыллахха, сылтан сыл аайы кэҥээн, уустугуран, тупсан иһиэхтээх дии саныыбын. Эһиилги тэрээһиннэргэ орто, улахан кылаас оҕолорун эмиэ интириэhиргэтэн суруттарыахха. Кыттааччылары көҕүлүүргэ, бэлиэтииргэ дьоһуннаах дьоннору ыҥырыахха, саха тыла сайдарыгар үлэлии-хамныы сылдьар патриот дьону эбэтэр тэрилтэлэринэн үлэһиттэргэ, оскуола оҕолоругар туспа күрэх курдук дьыктаан суруйтаран баран, олортон бастыҥнартан бастыҥнарын ыҥыран , дьыктаан олимпиадатын тэрийиэххэ. Үчүгэй бириистээх, хас да түһүмэхтээх. Элбэх тылга сыһыаннаах дьоннору түмэн, балаһыанньатын ырытан, толкуйдаан оҥоруохха. Оҕо тылланар кэмэ уһуйаан буолар. Улахан болҕомто бу кэмҥэ туһаайыллыахтаах. Онон маннык тэрилтэлэр булгуччулаах үлэни, кыттыыны ылыахтаахтар. Оннук да ирдэниллиэхтээх. Библиотека, администрация, кулууп, оскуола холбоһон ыытар тэрээһиннэрэ таһаарыылаахтык барда.Туоһу сурук тутан дьон сахалыы санааларын сааһылаан, дуоһуйан тарҕастылар»- диэтэ Галина Николаевна.
Күндү ааҕааччыларбытын, акцияҕа кыттыбыт бар дьоммутун төрөөбүт тыл уонна сурук-бичик күнүнэн эҕэрдэлиибит! Сахабыт тыла хас биирдии сахаттан тутулуктааҕын умнумуоҕуҥ. Луковцев В.Н., этэрин курдук: ''Төрөөбүт тылбыт баайа, эгэлгэтэ, сүмэтэ хас биирдиибитигэр арыллан истин, ийэ тылынан санаатын сайа этэр ыччат дьон ахсаана хаҥыы турдун''- диэн туран баҕа санаабытын тиэрдэбит.
