Продолжаем рубрику «Профессия вечная – библиотечная», приуроченную к 50-летию Детской библиотеки – филиала №15 «Моя библиотека». Своим воспоминанием делится Марфа Павловна Татаринова, проработавшая с 18 ноября 2002 года по 2005 год библиотекарем младшего абонемента.
Мин 2002 сыллаахха куораттааҕы оҕо библиотекатыгар младшай абонемеҥҥа үлэлии киирбитим. Оскуола кыра саастаах оҕолоро уонна детсад оҕолоругар төрөппүттэр дьиэҕэ кинигэ уларсан ааҕаллара. Ону таһынан үлэ араас көрүнүн туһанан үгүс тэрээһиннэри: кинигэ быыстапкаларыгар ырытыылары, библиотечнай уруоктары, араас темаҕа, бэлиэ күннэргэ, суруйааччылар юбилейдарыгар көрсүһүүлэри ыытарбыт. Ол курдук, Семен Андреевич Попову – Туматы, Ариадна Борисованы, Иван Мигалкины кытта көрсүһүүлэр олус да интэриэһинэйдик, долгутуулаахтык ааспыттара. Оҕолор наһаа интэриэһиргээн, сэҥээрэн элбэх ыйытыылары биэрбиттэрэ.
2004 с. Матрена Николаевна Аргунова, учуутал Вера Семеновна уонна мин «Почемучка» кулуубу тэрийэн үлэлээбиппит. Кэлин учууталлар да, оҕолор да сэҥээриилэрин ылан бэркэ сайдан, ааҕааччылар көхтөөхтүк кыттар буолбуттара. Таабырын, кроссворд таайаллара, аахпыт, сөбүлээбит кинигэлэринэн реферат суруйан сөхтөрбүттэрэ. Уус-уран айымньыларынан сценкалары да ооньууллара. Бары да көхтөөх, билиигэ-көрүүгэ тардыһыылаах этилэрэ. Аахпыт кэпсээннэринэн, остуоруйаларынан уруһуй бөҕөтүн уруһуйдууллара, ол уруһуйдарынан библиотекабытыгар, хаста да уокурукка быыстапка туруорбуппут. Ити сылтан саҕалаан, сүбэлэһэн баран, «Лето с книгой» диэн программанан үлэлээн саҕалаабыппыт. Үөрэх дьылын бүтүүтэ сорудахтаах тарҕаһаллара. Бу үлэ кылаас таһынан ааҕыыга наһаа көмөлөөх этэ. Күһүн үөрэх дьыла саҕаланыытыгар толорбут сорудахтарынан быыстапка туруорар этибит: ааҕааччылар уруһуйдара, саамай сөбүлээн аахпыт кинигэлэрин туһунан, суруйуулара, сайыҥҥы айылҕа кэрэ көстүүлэрэ, сайыны хайдах атаарбыттарын наһаа үчүгэйдик хоһуйан суруйууларыттан бары үөрэр этибит.
Кулууп үлэтэ ааҕааччылары, учууталлары, төрөппүттэри да көҕүлээбитэ, сэҥээрбиттэрэ, библиотекаҕа, ааҕыыга интэриэс үөскээбитэ.
26 оскуола 2 д кылааһын (учуутал М.С. Кронникова) ааҕааччылара айар чааска хоһоон суруйарга холоммуттара:
Саас кэллэ,
Чалбах таҕыста.
Сылаас буолла
Миигин үөртэ
(Тарасов Тускул)
Хаар уулунна,
Күн тыкта.
Халлаан сылыйда
Чыычаах ыллаата.
(Федоров Софрон)
Куттас куобах барахсан
Куотта-куотта дьиэтигэр.
Куттас-куттас куобахчаан
Куттаныма биһигиттэн.
(Андреева Маша)
Илиинэн суруйан «Күн уотун кыырпахтара» диэн кыракый кинигэ таһаарбыппыт.
Убаастыыр сэбиэдиссэйбэр Матрена Николаевнаҕа, эн-мин дэһэн бииргэ үлэлээбит коллегаларбар Ольга Ивановнаҕа, Анастасия Афанасьевнаҕа, Евдокия Хрисияновнаҕа истиҥҥник махтанабын. Наһаа эйэлээхтик, айымньылаахтык үлэлээбиппитин олоҕум биир кэрэ кэрчик кэмнэрэ дии саныыбын. Барыгытыгар үрдүк ситиһиилэри, айымньылаах үлэни, дьолу-соргуну, кытаанах доруобуйаны баҕарабын.
