Олунньу 10 күнүгэр «Маяк» библиотекаҕа саҥа сахалыы киинэ эйгэтигэр ураты суолталаах түгэн буолан ааста. Биллиилээх режиссер, сценарист Валентин Макаровтыын «Күүлэй. От кэмэ» киинэтин тула көрсүһүү тэрилиннэ. Бу тэрээһин саха киинэтин таптааччылары уонна култуура дьонун сүргэтин үрдэттэ.
Валентин Макаров саха киинэтин сайдыытыгар саҥа тыыны киллэрбит талааннаах режиссер быһыытынан биллэр. Сценарист быһыытынан көрдөөх-нардаах жанрга тус бэйэтэ бу иккис холонуута буолар. Хас биирдии үлэтигэр дириҥ ис хоһоону, сахалыы тыыны уонна дьоһуннаах олоҕу көрдөрөр.
«Күүлэй. От кэмэ» диэн саҥа киинэтэ – бу кини үлэтин салгыыта, ситиһиитин саҥа кэрдииһэ. Киһи уонна айылҕа быстыспат ситимин, саха дьонун олоҕун, сиэрин-майгытын, от кэмин ураты тыынын сүрдээх кэрэтик уонна дириҥник арыйбыт.
Көрсүһүү олус истиҥ тыынынан ааста. Киинэҕэ «Суорат» диэн көрдөөх-нардаах уолаттар айар холбоһуктарын биир бэрэстэбиитэллэриттэн саҕалаан, спорт эйгэтин дьоно, хаһан даҕаны киинэҕэ уһуллан көрбөтөх олохтоох дьон-сэргэ уһуллубуттар. Аатырбыт артыыс Гаврил Спиридонов эмиэ баар. Режиссер үлэтин уратыларын, артыыстары хайдах сүүмэрдээн талбытын сиһилии кэпсээтэ. Көрөөччүлэр элбэх ыйытыыны биэрэн, киинэ ис хоһоонун, геройдарын туһунан санааларын үллэһиннилэр, киинэ ис дууһаларыгар дириҥник киирбитин, айылҕаны, төрөөбүт дойдуларын өссө күүскэ таптаабыттарын бэлиэтээтилэр. Ааптар хас биирдии ыйытыыга аһаҕастык, истиҥник хоруйдаата.
Маннык тэрээһиннэр саха култуурата сайдарыгар, киинэ эйгэтэ кэҥииригэр олус улахан суолталаахтар. Валентин Макаров «Күүлэй. От кэмэ» киинэтэ саха киинэтигэр бэлиэ суолу хаалларыаҕа диэн эрэл баар уонна саха култууратын, тыынын тарҕатарга улахан көмөлөөх буолуоҕа. Эдэр, эрэллээх режиссерга Валентин Макаровка ыҥырыыбытын ылынан кэлбитигэр барҕа махтал тиэрдэбит, айар-үлэҕэр өссө элбэх ситиһиилэри! Бу курдук иннин диэкки баран ис, хас биирдии хайысхан таһаарыылаах буоллун!
Саха киинэтин сөбүлээн көрөөччүлэри, сүгүрүйээччилэри өрөспүүбүлүкэбит туох баар киинэ тыйаатырдарыгар, нэһилиэктэр кулууптарыгар буола турар «Күүлэй. От кэмэ» киинэни көрөргө ыҥырабыт.
