Кыраайы үөрэтэр В.Г. Белинскэй аатынан бибилэтиэкэҕэ ааҕааччылар саха литэрэтиирэтин төрүттээччи, улуу суруйааччы, бөлүһүөк Алексей Елисеевич Кулаковскай-Өксөкүлээх Өлөксөй сиэнин Лариса Реасовна Кулаковскаяны көрөөрү, кинини истээри, санааларын этээри тоҕуоруспуттара.
Көрсүһүү саха суругунан литературатын 125 сылын чэрчитинэн буолан ааста.
Саха суругунан бастакы айымньытынан – «Байанай алгыһа» поэма буолар (1900). Бу айымньыга аналлаах быыстапка туруоруллубутун ааҕааччылар кэрэхсээн көрдүлэр.
Саха норуодунай артыыһа, РФ уонна СӨ үтүөлээх артыыһа, бибилэтиэкэ партнера Дмитрий Артемьев «Ойуун түүлэ» поэманы аан-бастаан аахпытын мустубуттар олус биһирээтилэр.
Өксөкүлээх Өлөксөй сиэнэ Лариса Реасовна Кулаковская олус истиҥник төрүттэрин, эһэтин, төрөппүттэрин, бииргэ төрөөбүттэрин туһунан кэпсээтэ,эһэтин айымньыларын саҥа кинигэлэрин кытта билиһиннэрдэ. Көрсүһээччилэр чугас дьонун, дьиэ кэргэнин, аймахтарын бэрт сэдэх хаартыскаларын көрдулэр. Космоска тахса сылдьыбыт кырачаан кинигэни тутан-хабан, илэ көрөн үөрдүлэр.
Үгэс быһыытынан суруйааччыларга анаан бибилэтиэкэрдэр оҥорбут кинигэ кыбытыыларыттан ааҕааччылар саха духуобунай лиидэрэ алгыстарын дорҕоонноохтук аахтылар, өйдөбүнньүк гына ыллылар.
Дьон санааларын дуоһуйа үллэстэн, сахалар сүдү киһибит туһунан бэрт үгүһү билэн-көрөн, дириҥ ис хоһоонноох көрсүһүүттэн астынан тарҕастылар.
