Ахтыы кинигэтин оҥорон таһаарыы көлүөнэни ситимниир кинигэ буолар.
Чугас дьонун тустарынан ахтыылары суруйан хаалларар — тугунан да сыаналаммат сыаннас.
Кинигэни оҥорон таһаарыы саҥа киһиэхэ олус үлэлээх, түбүктээх , билбэтэ-көрбөтө да элбэх буолар.
Онно күүс-көмө буолуоҕа диэн сыаллаах ааҕааччыларбытыгар аналлаах ахтыы кинигэлэрин ааптардарын кытта көрсүһүү «сэтинньи сэттистиир» күнүгэр буолан ааста.
Ыалдьыттарынан буоллулар бибилэтиэкэбит ааҕааччылара: Попова Елизавета Семеновна уонна Кошунова Айталина Афанасьевна. Кинилэр мустубут дьоҥҥо кинигэлэрин туохтан саҕалаабыттарыттан саҕалаан ханнык издательстволарга хаачыстыбалаахтык уонна чэпчэкитик таһааттарбыттарыгар тиийэ саас-сааһынан лоп-бааччы сэһэргээтилэр. Ону таһынан ыалдьыттарбыт бэйэлэрин уопуттарыттан түһалаах сүбэлэри, ыйыы-кэрдии биэрдилэр.
Айталина Афанасьевна «Ахтыы кинигэтин таһаарыы» диэн бэйэтин өйдөбүнньүгүн көрдөрөн, сырдатан, мустубуттар сэҥээриилэрин ылла уонна кинилэргэ бэлэх уунна.
Көрсүһүү кыттыылаахтара боппуруостарыгар толору эппиэттэри ылан, үгүһү эбинэн, махтанан тарҕастылар. Онон көрсүһүүбүт сыала-соруга туолбутугар Елизавета Семеновнаҕа уонна Айталина Афанасьевнаҕа махтанабын уонна бары үчүгэйи баҕарабын.
