Саха төрүт таҥаһа баай-талым, сиэдэрэй. Биллэн турар, саха таҥаһын сайдыыта үйэ сайдыытын кытта ыкса сибээстээх. Саха уран таҥаһа кэрэ аҥардары умсугутар, тардар. Кэнники кэмҥэ бэйэ тигиитин да, бэлэми да кэтэр киһи ахсаана эбиллэн иһэр. Кырдьык даҕаны ити кэтэр таҥастарбыт тигиилэрэ сылтан сыл тупсан иһэллэр, национальнай таҥас коллекциятын хаҥаталлар.Төрүт саха таҥаһа Аан дойдуга кэрэхсэнэр буолла.
Ыам ыйын 17 күнүгэр В.Г. Белинскэй аатынан Кыраайы үөрэтэр бибилэтиэкэҕэ талааннаах таҥас тигээччи, педагог, элбэх авторскай таҥас ньэмиэтин айааччы уонна сахалыы таҥас тигээччи Ефимова Виктория Аркадьевна халадаай быһыытын кырыйыыга олус кэрэхсэбиллээх маастар-кылаас биэрдэ.
Уран тарбахтаах иистэнньэҥ бэйэтин илиитинэн аныгылыы тупсаран тикпит тупсаҕай көстүүлээх былаачыйаларын туһунан кэпсээтэ, бэйэтэ айбыт былааччыйа ньэмиэтин бэйэҕэ анаан сөпкө быһарга үөрэттэ, халадаайы тигэргэ ханнык матырыйаал ордугун, таҥаска-сапка өҥнөр дьүөрэлэһиилэрин, иис кистэлэҥнэрин, албастарын сиһилии кэпсээтэ.
Маастар-кылаас кыттыылаахтара өбүгэ кэрэтин утумнаан бар-дьонун киэргэтэр үтүөкэн дьарыктаах Виктория Аркадьевнаҕа истиҥник махтанан, саҥаны билэн-көрөн, киэп быһарга үөрэнэн уйгулаах ыһыахпытыгар сахалыы таҥнан-симэнэн наскылдьыйа хаамсыах буолан тарҕастылар.
«Төрүт иис кистэлэҥнэрэ» кинигэ, сурунаал быыстапката турда, кэлбит дьон болҕомтотун тарта.
