Сыл аайы дойдубут үрдүнэн «Маһы олордуу күнэ» диэн экологическай аахсыйа чэрчитинэн мас олордуутун субуотунньуктара ыытыллаллар. Бу аахсыйа аан бастаан 2011 сыллаахха ыам ыйын 14 күнүгэр Ойуур хаһаайыстыбатын Федеральнай агентствотын көҕүлээһининэн буолбута уонна үтүө үгэскэ кубулуйда.
Бу аахсыйаҕа кыттыһан, ыам ыйын 29 күнүгэр саҥа арыллыбыт сахаттан бастакы Сэбиэскэй Сойуус Дьоруойа Федор Кузьмич Попов аатынан скверы көҕөрдүү буолла. Мэҥэ Хаҥалас улууһун Баатара нэһилиэгин баһылыга Акимов Дмитрий Дмитриевич дьоруой төрөөбүт алааһыттан Сыҥаһалаахтан 21 хатыҥ маһы түөрдэрэн аҕалтарбыта. Хатыҥнары олордууга Дьокуускай куоракка олорор биир дойдулаахтара, хаан-уруу аймахтара, Кыраайы үөрэтэр В. Г. Белинскэй аатынан бибилэтиэкэ үлэһиттэрэ кыттыыны ыллылар.
Тэрээһин хас биирдиибит маннык аахсыйаларга кыттан, тулалыыр эйгэҕэ харыстабыллаахтык сыһыаннаһарга сэмэй кылааппытын киллэрэбит диэн уопсай хаартыскаҕа түһүүнэн түмүктэннэ.
Санатар эбит буоллахха, ыам ыйын 8 күнүгэр Кыайыы 80 сылын көрсө үөрүүлээх быһыыга-майгыга Сэбиэскэй Сойуус Дьоруойа Федор Кузьмич Попов пааматынньыга уонна кини аатынан сквер арыллыбыттара. Пааматынньыгы чочуйан оҥорбуттара Арассыыйа Худуоһунньуктарын Айар сойууһун чилиэнэ Павел Чямпин уонна архитектор, Арассыыйа архитектордарын сойууһун чилиэнэ Сергей Лукин.
