Бүгүн, «Кэпсээ» кулууп чэрчитинэн, «Уот Дьулустаан» диэн сериал артыыстарын уонна сэhэн ааптарын кытта көрсүһүү буолан ааста. Кулууп үлэлээбитэ номнуо ахсыс сыла буолла, араас көрсүһүүлэрэ библиотека иһигэр ыытыллааччылар, ол эрэн бүгүн аҕа саастаах дьоммутун ытыктаан Өрөспүүбүлүкэтээҕи В.П. Решетникова аатынан интернатка ааста. Урут улахан көрсүһүүлэртэн «Сааскы кэм» киинэ режиссерун, онно оонньообут артыстары кытта керсукэн турардаахпыт. Ону тэҥэ «Ахтан санаан ааһыаҕын» диэн Аркадий Новиковка аналлаах көрсүһүүгэ Клим Федоров уонна Майа бөһүөлэк көр-күлүү театрдарын артыыстара кэлэн ыалдьыттаабыттара.
Бу күнннэргэ бары сөбүлээн көрөр «Уот Дьулустаан» диэн сериалбыт түмүктэннэ. Бу сериал дьон сэргэ биһирэбилин ылла, оруоллары артыстарбыт бэрткэ арыйан көрдөрдүлэр. Валентина Николаевна Гаврильева диэн биллиилээх, ураты көрүүлээх, туспа суоллаах-иистээх айымньылардаах суруйааччы сэһэнигэр олоҕуран уһуллубут. Киинэ режиссера Елена Эверстова, сценарист Катерина Григорьева. Биһиэхэ ыалдыттаатылар: сэһэн ааптара Валентина Николаевна Гаврильева; Майя Слепцова - СӨ үтүөлээх артыыһа (Сүөкүлэ); Алгыс Макаров-Сиэн Мөрөс (Тойон); Екатерина Семенова (Ылдьаана); Анисья Колесова (Алтан сирэй) уонна СӨ «Кырсаада» литературнай тумсуу салайааччыта - Басылайкина Галина Григорьевна -Кэнтик.
Көрсүһүү олус эйэҕэстик ааста, артыыстар киинэ туһунан санааларын, съемка кэмиттэн түгэннэрин уонна инники былааннарын кэпсээтилэр, ыйытыктарга хоруйдаатылар. Маннык тэрээһиннэр интернат олохтоохторугар улахан суолталаахтар, кинилэр үөрэллэр уонна кэпсэтэн сэргэхсийэллэр. Ааптарбытыгар уонна артыыстарбытыгар махтанабыт уонна баҕарабыт өссө даҕаны таһааарыылаах үлэни, тус олоххутугар дьолу-соргуну!
Ыстатыйаны бэлэмнээтэ: Айталина Другина
