Буойун-поэт, тылбаасчыт. Кузьмин Макар Иванович - Макар Хара 1915 сыллаахха муус устар 26 күнүгэр Таатта улууһугар «Чыычай» алааска күн сирин көрбүтэ.
Уоттаах сэриигэ 4 сыл арҕаа сулууспалаабыта. Ленинград блокадатыгар рота политругунан, кэлин 1-кы Белорусскай фроҥҥа взвод командирынан, рота партийнай тэрийээччитинэн сылдьыбыта.
Сэрииттэн ыыппыт хоһооннорун түмэн 1943 с. «Саргылана» диэн ааттаах ырыа-хоһоон кинигэтэ тахсыбыта.
Сэриигэ сылдьан буорах сыттаах 90-ча хоһоону суруйбута. Сахалартан саамай элбэх ырыаны суруйбут поэтынан Макар Хара буолар. Кини окуопаҕа сытан бэрт элбэх ырыа буолбут хоһооннору айбыта.
Туох-ханнык иннинэ, Макар Хара – лирик поэт. Кини кэргэнэ-ырыаһыт Егорова Анна Ивановна сорох хоһоонноругар мелодия айан ыллыыра. Поэт лириката нарын-намчы иэйиилээх буолан ааҕааччы сүрэҕин сүүйбүтэ.
Макар Хара хас биирдии саха киһитин үчүгэйтэн, кэскиллээхтэн үөрүүтүн, төрөөбүт сирин инникитэ кэрэтиттэн өрө көтөҕүллүүтүн үгүс хоһоонноругар бэрт сатабыллаахтык эппитэ.
Кини сэрии толоонун ортотунан ааспыт буойун буолан, элбэх хоһоонноро олохпут үтүөлээх дьоннорун кытта сибээстиир, үгэстэри утумнуурга ыҥырар аналлаахтар.
Буойун-поэт Макар Хара айар үлэтэ өлбөт-сүппэт үйэлээх, умнуллубат аналлаах!
