Бибилэтиэкэҕэ - Артика күннэрэ[6+]

Кулун тутар 19 күнүгэр Саха сиригэр Арктика күнэ бэлиэтэнэр. Арктика улуустарын сайыннарар уонна өйүүр инниттэн Ил Дархан Егор Борисов ыйааҕынан 2014 сыллаахха Арктика күнэ олохтоммута. Онтон ыла сыллата үгэс быһыытынан араас тэрээһиннэр буола тураллар. 

Н.Д. Неустроев аатынан SMART-библиотекаҕа «Айыы Кыһатын» 4-с кылааһын үөрэнээччилэригэр аҕыйах ахсааннаах хотугу норуоттар олохторун-дьаһахтарын, дьарыктарын, үгэстэрин, куруутун ыытыллар өбүгэ оонньууларын кэпсиир, үөрэтэр бибилэтиэкэ уруога буолла.

Уруокка оҕолор хотугу норуоттар спортивнай оонньууларын: мас тутуурдаах сүүрүү, аркааны ыраах быраҕыы, наартаны үрдүнэн ыстаныы, мас тардыhыыта уонна көрөөччү болҕомтотун тардар табанан куоталаһыы күрэстэрин билистилэр, көрдүлэр, иһиттилэр. 

Оҕолорго аналлаах Коми норуотун «Дьабарааскылаах мэкчиргэ», «Үрүҥ ойуун», «Балыксыттар» оонньууларын оонньоотулар. Олус көхтөөх буолан бары кыттыыны ыллылар. Саҥа оонньуулары кытта билсэн сэргэхсийдилэр, үөрдүлэр-көттүлэр. Тэрээһини хотугулуу үҥкүү флешмобунан түмүктээтилэр. Кэлбит ааҕааччыларбытыгар махтанабыт.

Оонньуу нөҥүө хотугу норуот бултуур ньымаларын үөрэтии, олохторун-дьаһахтарын, дьарыктарын билиһиннэрии оҕоҕо олус тиийимтиэ, өйдөнүмтүө.