Бэҕэһээ, алтынньы 15 күнүгэр, Н.Д.Неустроев аатынан Дьокуускай куорат киин библиотекатыгар «Айгы ситимэ” түмсүү уонна Дьокуускай куорат библиотекаларын ситимэ бииргэ улэлииргэ сүбэлэһии түһэристилэр. Киэҥ уораҕайга бу түмсүү уонна кииннэммит библиотека салайааччылара «Айгы ситимэ» кыттыылаахтарын кытары онлайн холбонон, көрсөн-истиһэн, ирэ-хоро кэпсэттилэр.
Түмсүү үлэтин салайааччы Александр ПРОТОДЬЯКОНОВ билиһиннэрдэ: «Биһиги духуобунай эйгэни сайыннарар кулууппутун 4 сыллааҕыта тэрийэн үлэлээн саҕалаабыппыт. Бу сыллар тухары 50 тахса бырайыагы оҥордубут, араас тэрээһиннэри тэрийэн дьон биһирэбилин ыллыбыт. Онтон саамай биллибиппит, республика дьонун киэҥ болҕомтотун ылбыт, «Суруйааччылар уонна атыыһыттар алаастарынан» диэн маршруттар, ону таһынан Улуу убайдарбыт- суруйааччылар үбүлүөйдээх күннэрин бэлиэтиир, суолталыыр тэрээһиннэрбит буолаллар. Култууратын умнубут, сүтэрбит норуот симэлийэр, инники кэскилэ быстар диэн бэлиэтээн этиэххэ наада. Ол иһин култуураны сайыннарыы, киэҥ, дириҥ өйдөбүлүнэн, инники күөҥҥэ туруохтаах, хайдах баҕарар балаһыанньаҕа, ханнык баҕарар кэмнэргэ. Биһиги кулууппут сүрүн сыалынан норуоппут дьонун төрөөбүт тылларыгар сыһыарыы, үөрэтии, кэҥэтии, киһи удьуорун устуоруйатын, төрүччүтүн билиитэ, үөрэтиитэ. Ону таһынан хас биирдии киһиэхэ нэһилиэк, улуус, дойду, норуот устуоруйатын, култууратын, төрүт үгэстэрин билии, үөрэтии буолаллар. Онно эбии география, топонимика, олорон ааспыт улуу дьон олохторун сүрүн хаамыытын үөрэтиилэр эмиэ киирсэллэр. Онон норуотун тылын, култууратын, төрүт үгэстэрин, уостуоруйатын сэргиир дьону биһиэхэ кыттыһарга ыҥырабыт, биһиги өрүү саҥа санааларга, көрүүлэргэ бэлэммит».
Бу бэлиэ тэрээһиҥҥэ кулууп кыттыылахтара республика араас муннуктарыттан Интернет ситимин нөҥүө холбонон туох саҥа сүүрээн киллэриэххэ сөбүн, ханнык хайысхаҕа эбии үлэлэһиэххэ сөбүн тула санааларын үллэһиннилэр. Элбэх кыттааччы кулууп маршруттары тэрийбитин уонна төрүччүнү оҥорорго былааннарын сэргииллэрин эттилэр. Дьокуускай куорат библиотекаларын ситимин аатыттан салайааччы Нюргуяна РЕШЕТНИКОВА быйыл кулууп «Суруйааччылар алаастарынан» маршрутунан сылдьыһан баран, бу түмсүү үлэтин сэргээбитин, улахан хабааннаах үлэ барарын сөхпүтүн онтон сиэттэрэн библиотекалар үлэлэһэргэ бэлэмнэрин эттэ.
Дьокуускай куорат библиотекаларын ситимин сырдатар үлэҕэ отделын суруйуута.
