Аахпыт кинигэҕэр сыанабылла суруй диэн, библиотекам оҕолоро хаайбыттарын, быһа гыммакка аҕыйах тыл суруйан көрүөм.
Билигин киһи барыта суруйаччы аатырар, кинигэ бөҕө хара баһаам тахсар. Урукку улуу классиктарбыт Амма Аччыгыйа, Николай Якутскай, Эрилик Эристиин о.д.а, курдук таһымнаах суруйааччы суох да буоллар, сахалыы тыллаах айымньылар тахса тураллара уөруулээх.
Кэлин аахпыт кинигэлэрбиттэн, Данил Макеев «Кыргыс толоонугар көрсуһүү» диэн, кэпсээннэр, тылбаастар киирбит хомуурунньуктарын чорботуом этэ. Сэрии сылларын оҕото, үлэ көлөһүнүн аһыы амтанын эрдэ билбит киһи буолан буолуо, «Ат хараҕа» диэн кэпсээнэ, олус чугастык киирдэ. Оччотооҕу оҕо, мунньартан саҕалаан, охсор массыынатыгар тиийэ, ат көлөлүүн эриһэр. Сүрүн герой Баһылай хотуулаах улэһит, бэйэтэ айааһаабыт атын Улаанайы кытары, уоттаах сэрии кэмигэр сүтэрсэн баран, көрсүһэр дьоллоох, онтон доҕору сүтэрэр хараастабыллаах тугэннэрин аахтахха, саха саллаатынан, кини Сахабыт сиригэр, Ийэ дойдуга муҥура суох тапталынан, киэн туттуохха сеп.
Аны «Үөлээннээхтэр» диэн кэпсээн туһунан. Мин өруу саныыр этим, алааһыттан арахпатах, нууччалыы билбэт саха барахсан, мунан-тэнэн, быһаарсыаҕы даҕаны сатаан аахсыбакка, үүрүүгэ-утуруллуугэ сылдьыбыт да буоллахпытына көҥүл. Эмиэ баар суол ойууланар. Ойуурдаах куобах охтубат дииллэрин курдук, биир сомоҕо буолуохха.
Хараҕа суох ньирэйи иитэр аһыныгас оҕо Куока, мөлтөххө көмөлөһөр, өйөбул буоларга санааны күөртүүр. Уопсайынан бу кэпсээни ааҕан баран, ынах суөһүлээх саха эстибэт диэн санааҕа кэлэҕин.
Өссө сэҥээрбитим, бу хомуурунньукка киирбит тылбаастар. Мин нууччалыы сатаан аахпат киһиэхэ В.Шукшин, И.Бунин курдук үтүө суруйааччылар айымньыларын ааҕар дьолго тигистим.
Саҥа кинигэ таҕыста диэн, үөрэн-көтөн, анаан-минээн кинигэ уурар оҕолорбор, библиотека улэһиттэригэр Махталы, үтүө санааны кытары аҕам саастаах ааҕааччы Илистянов Христофор Егорович.
