Саха Өрөспүүбүлүкэтин үтүөлээх артыыһа, поэт, прозаик, РФ суруйааччыларын союһун чилиэнэ, П.А. Ойуунускай государственнай бириэмийэ лауреата – Елена Васильевна Слепцова-Куорсуннаах нууччалыыттан сахалыы тылбаастаабыт «Кыра Тыгын» айымньытынан «Остуоруйаны кырааскалаа» диэн оҕолорго аналлаах раскраска күн сирин көрдө.
Антуан де Сент-Экзюпери «Маленький принц» айымньыта суруллубута номнуо 80-тан тахса сыл ааста. Кини аан дойдуга биллэр суруйааччы, летчик, гражданскай авиация сайыннарыытыгар улахан сыратын иһин «Почетный легион» орден хаһаайына. «Маленький принц» остуоруйата аан дойдуга буола турар улахан дьулаан бириэмэтигэр 1943 сыллаахха күн сирин көрбүтэ уонна дьиҥнээх дьиктини аҕалбыта. Кини сэрии бириэмэтигэр дьон дууһутыгар умнуллубут кэрэни, тапталы тилиннэрбитэ, эрэли бэлэхтээбитэ, хом санаалары чэпчэппитэ. «Маленький принц» 302-тэн тахса аан дойду уонна Россия норуоттарын тылыгар тылбаастаммыта. 2019 сылтан аатырбыт остуоруйаны биһиги сахалыы тылынан ааҕар буолбуппут.
Түгэнинэн туһанан убаастыыр, ытыктыыр, кыралыын-улаханныын таптыыр суруйааччыбытын Елена Васильевна-Куорсуннааҕы үөрүүлээх үбүлүөйгүнэн В.Г. Белинскэй аатынан Кыраайы үөрэтэр библиотека үлэһиттэрин уонна Жатайдааҕы «Василек» оҕо уһуйаанын иитээччитэ Валентина Николаевна Заболоцкая ааттарыттан итиитик-истиҥник эҕэрдэлиибит. Баҕарабыт чэгиэн-чэбдик сылдьаргар, дьиэ кэргэҥҥэр ил-эйэ эҥээрдэстин, төрөөбүт тылгыт сүмэтин сомсон, айар-тутар аартыккыт арылла туруохтун диэн алгыыбыт!
Ыстатыйаны бэлэмнээтэ: Саргылана Колесова
