Трибун-поэт Серафим Романович Кулачиков - Эллэй төрөөбүтэ 120[12+]

Саха норуотугар кырдьары билбэт төлөннөөх трибун-поэт Серафим Романович Кулачиков - Эллэй төрөөбүтэ 120 сылыгар аналлаах Н.Д.  Неустроев аатынан SMART-библиотекаҕа киэҥ ис хоһоонноох  тэрээһиннэр буолан аастылар. 

Дьокуускай куорат национальнай гимназиятын 10-с кылааһын үөрэнээччилэригэр суруйааччы Серафим Романович Кулачиков-Эллэй олоҕун уонна айар үлэтин туһунан кэпсиир,  үөрэтэр,  толкуйдатар «Күөгэйэр күннэрбэр» оонньуу-уруок буолла. Суруйааччы олоҕун, айар үлэтин туһунан кэпсэтии кэнниттэн оҕолор «Буурҕа,  буулдьа дьылын туойбут уһулуччулаах поэт»  онлайн-викторинаҕа  оонньоотулар, билиилэрин чиҥэттилэр. Библиотека сайтын кытта билистилэр, хайдах туһанарга үөрэннилэр. Кылаас  салайааччыта саха тылын уонна литературатын учуутала Капитолина Семеновна. 

Ахсынньы 7 күнүгэр поэт төрөөбүтэ 120 сылыгар аналлаах төгүрүк остуол буолла. Бу тэрээһини суруйааччы биир дойдулаахтара тэрийэн ыыттылар. Төгүрүк остуолга «Чолбон» сурунаал  бас эрэдээктэрэ, Саха сирин суруйааччыларын сойууһун бэрэссэдээтэлэ, поэт, публицист, тылбаасчыт Гаврил Андросов, поэт, прозаик, литературнай критик, тылбаасчыт, суруналыыс, СР норуодунай суруйааччыта Семен Андреевич Попов-Сэмэн Тумат, «Чычымах тумсүүтүн» бэрэссэдээтэлэ Петр Варламов, суруйааччы уола Иосиф Кулачиков, кыыһа Наталья Спиридонова, Эллэй сиэн кыргыттара Анфиса Витальевна, Светлана Витальевна уо.д.а. кыттыыны ыллылар. Кэскиллээх кэпсэтии кэннэ суруйааччы аатын үйэтитиигэ элбэх үлэ ыытыллара былааҥҥа киирдэ. 

 
Саха дьонугар Эллэйи билбэт, кини хоһооннорун аахпатах киһи суоҕа буолуо. Кини үйэ аҥарыттан ордук кэмҥэ төрөөбүт норуотугар мэлдьи биир үлэҕэ сырытта – кини поэт. Ол курдук, «Үйэлээх тапталыҥ ырыаҕар мэлдьи баар...» поэт ырыа буолбут хоһооннорунан олус истиҥ биэчэр тэриллибитэ. Биэчэри «Сайсары» норуодунай ансамбль, үһүс көлүөнэ оскуола иһинэн үлэлиир «Сыдьаайа» ырыа бөлөхтөрө киэргэттилэр, салайааччы СР культуратын туйгуна С.К. Степанова. Кэлбит ааҕааччылар суруйааччы айар үлэтин туһунан саҥаны биллилэр, поэт ырыа буолбут хоһооннорун дуоһуйа иһиттилэр, ыллаатылар! 

Ити курдук,  Саха народнай поэта С.Р. Кулачиков-Эллэй төрөөбүтэ 120 сылын үрдүк таһымнаахтык бэлиэтээтибит. «Солбуллубат дьон» диэн суохтар дииллэр. Комбайнеры, шахтеру, директоры, министри хаһан баҕарар солбуйуохха сөп. Искусствоҕа ити кыайтарбат. Тыһыынча да уран тыллааҕы мунньан дьиҥнээх поэты солбуйбаккын. Эллэйтэн ордук талааннаахтар үгүс буолуохтарын сөп. Ол эрээри Эллэй – аан дойдуга хатыламмат ураты талаан!