Күндү ааҕааччылар! Бүгүн эһигини «Уран тыл оһуора» түмсүү салайааччытын кытары билиһиннэрэрбитин көҥүллээн.
Раиса Николаевна Тимофеева-Михайлова чугас доҕотторо, атастара, «Уран тыл оһуора» ааптардара түмсүү салайааччытын үлэтин туһунан биһиги көрдөһүүбүтүнэн билиһиннэрии сурук суруйдулар.
Нажмите для увеличения
«Раиса Николаевна Тимофеева-Михайлова Хаҥалас улууһун Тиит-Арыы дэриэбинэтигэр 1966 сыллаахха төрөөбүтэ. Төрөөбүт Сахатын сирэ, ийэ айылҕата тупса, чэчирии турарыгар, саха тыла көлүөнэттэн көлүөнэҕэ хаалан иһэрин, сүппэтин, сайдарын туһугар, олохтоох хоту сирин дьоно доруобай буоларыгар элбэх үлэ ыытта. Биир киһи холугар дьэ элбэх ҮЛЭ үлэлэннэ. Хоһооннору, алгыстары, ырыалары айар, суруйар. Уон кинигэ ааптара буолар.
2018 сыл олунньу 8 күнүттэн «Уран тыл оһуора» түмсүү тэрийэн үлэтин саҕалаабыта. Бу түмсүүгэ бүтүн Саха сирин улуустарыттан араас идэлээх, айар куттаах, хоһоону хоһуйан көтүтээччилэр, ылбаҕай ырыаны матыыптаан айааччылар түмсэн үлэлии олоробут.
Раиса Николаевна хас биирдии киһи төрөөбүт дойдутун туһугар, Саха сирэ сайдарыгар, төрүт сахалыы тылын умнубатын туһугар, төрөөбүт сирин айылҕатын харыстыырын туһугар улахан кылаатын уурда. Ол курдук түөрт сыл иһигэр утуйар уутун умнан туран түүннэри-күнүстэри, сылайар диэни билбэккэ 85 кинигэ таһаарда. Уопсайа 9 200 кинигэ буолла.
170 тахса үрдүк салалтаҕа үлэлиир тэрилтэлэргэ, оскуолаларга, оҕо уһуйааннарыгар, бибилэтиэкэлэргэ, мусуойдарга сылдьан 6 500 тахса кинигэ бэлэхтээтэ.
Саха сирин Национальнай бибилэтиэкэтигэр 180 кинигэ бэлэх уунна. Элбэх улуустан доҕотторун мунньан 29 улахан бырайыак оҥордо, Сахабыт сирин кэрэ сирдэринэн сырытыннаран, мусуойдары кытта бииргэ үлэлээн элбэҕи кэпсэттэ уонна көрдөрдө. Бу түмсүүгэ баар хас биирдии суруйааччы көрүүтэ кэҥээн, сахатын тылын өссө чочуйан хоһооно тупсарыгар үлэлэстэ.
Өрөспүүбүлүкэ улахан тэрилтэлэрин, ол курдук айылҕа министиэрстибэтин, М.К. Аммосов аатынан Хотугулуу-Илиҥҥи федеральнай университет, Ойуунускай мусуойун, Национальнай бибилэтиэкэ, Белинскэй аатынан бибилэтиэкэ, Сайсар уокуругун бибилэтиэкэтэ, оҕо бибилэтиэкэлэрэ, «Арчы» духуобунай киинэ тэрийэр тэрээһиннэригэр көхтөөхтүк дьонун-сэргэтин мунньан, кэпсэтэн, кыттыыны ылла. Түмсүү хас биирдии киһитэ ааптарскай кинигэлэнэрин туһугар 39 киһиэхэ бэйэтэ ис санаатынан көмөлөһөн, буор босхо сүүрэн-көтөн, көмөлөһөн 49 кинигэ таһаарда.
Нажмите для увеличения
Сахалыы хоһооннору нууччалыы тылбаастатан Арассыыйа улахан куораттарын бибилэтиэкэлэригэр элбэх кинигэ ыытта. «Элиэнэ очуостара» диэн Саха сирин кэрэ көстүүтүн көрдөрөр, үс омук тылынан сахалыы, нууччалыы, английскайдыы хоһооннору тылбаастатан, улахан кинигэ оҥорон, Аан дойдуга тиийэ тарҕанар кинигэни оҥорон таһаарда. Ону таһынан 2020 с. Раиса Николаевна айар куттаах, суруйар оҕолорго анаан өрөспүүбулүкэтээҕи хоһоон, кэпсээн, ыстатыйа күрэҕин ыыппыта. Алта сааһыттан саҕалаан уон биирис кылааска дылы оскуолаҕа үөрэнэр 35 оҕо кыттыыны ылбыттара. Оҕолор бары анал ааттаах грамота уонна кинигэ бэлэх туппуттара.
«Сырдьык Сыдьаайа» диэн ааттаан элбэх улуустан айар куттаах хоһоон, кэпсээн суруйар оҕолору мунньан үөрэтэ олорор. Оҕолор хоһооннорун мунньан, икки хомуурунньук кинигэлэннилэр. Улууска үлэлии олорор биэс литературнай түмсүүлэри кытары кэпсэтэн, тиийэн, көрсөн, илии тутуһан, үлэтин кэпсээн, санаа атастаһан улахан хабааннаах көрсүһүүлэри тэрийдэ. Ханна да сырыттар уоннуу, сүүрбэлии уонна өссө элбэх кинигэ бэлэх уунан иһэр. Таһаарбыт кинигэлэрин бутүн Арассыыйа улахан куораттарыгар, ол курдук Москва биэс улахан бибилэтиэкэтигэр, Санкт-Петербург, Новосибирск, Хабаровск, Благовещенск бибилэтиэкэлэригэр ыыта олорор. Тулаайах оҕолор дьиэлэрин таһыгар баар улахан ырааһыйаны түмсүүтүн дьонун илдьэ баран элбэх бөҕү хомуйдубут. Сайын Хаҥалас улууһугар Элиэнэ эбэ кытылын устун бөҕүн-сыыһын ыраастаатыбыт.
Раиса Николаевна курдук Саха сирэ уонна саха тыла сайдарын туһугар маннык улахан хабааннаах үлэни ким да күн бүгүнүгэр дылы оҥоро илик...»
«Уран тыл оһуора» түмсүү
Тохсунньу, 2023 с.
P.S. Хаартыскаҕа баар сурунааллары «Маяк» библиотекатыттан уларсыаххытын сөп.
