Саха биллиилээх бэйиэтэ, уус-уран тыл хатыламмат маастара, тылбаасчыт Сивцев Ефрем Степанович - Таллан Бүрэ тохсунньу 25 күнүгэр төрөөбүтэ 115 сылыгар аналлаах «Лирик-поэт Таллан Бүрэ» диэн тэрээһин буолан ааста.
Билиҥҥи тирээн турар сорукпут - сахалыы тылбытын сайыннарыы, оҕолору сахалыы саҥарда, саха суруйааччыларын айымньыларыгар интэриэһи үөскэтии буолар. Дьэ, онон, тэрээһиммит, суруйааччы олоҕун уонна айар үлэтин туһунан Н.Д. Неустроев аатынан Smart-библиотека иһинэн тахсар «Айар үлэ ыллыгынан» оҕолор кыттыылаах видеорубриканы көрүүттэн саҕаланна. Дьокуускай куорат 1-кы №-дээх орто оскуолатын саха тылын уонна литературатын учуутала Попова А.Д. үөрэтэр 7-с кылааһын үөрэнээччилэрэ бу устууга бииргэ үөрэнэр, күннэтэ алтыһар оҕолоро Сивцев Эльдар, Попов Тимур, Осипова Нарияна, Афанасьева Сайыына, Дьячковская Анджелла кыттыыны ылбыттарын, биэриигэ уһуллубуттарын, суруйааччы туһунан кэпсээбиттэрин олус сэҥээрэ, кэрэхсии көрдүлэр, сахалыы саҥаралларыттан соһуйдулар. Маҥнайгы холонуубут табыллыбытыттан бары даҕаны олус үөрдүбүт, оҕолорбутугар Махтал суруктары туттартаатыбыт уонна инникитин даҕаны бииргэ үлэлэһэргэ дэстибит.
Салгыы оҕолорго библиотека устун экскурсия буолла. Үс этээһинэн сылдьан библиотека араас салааларын, кинигэлэрин, быыстапкаларын, ааҕар сааланы кытта билистилэр, кинигэни библиотекарь көмөтө суох хайдах уларсыахтаахтарын, туттарыахтаахтарын көрдүлэр-иһиттилэр, ыччат муннугар сынньанан ыллылар.
Сити курдук, сонун тэрээһин сыалын ситэн, бары астынан, өссө да көрсүөх буолан тарҕастыбыт.
