Ахсынньы ыйга саха литературатын төрүүттээччилэртэн биирдэстэрэ, сэһэнньит - суруйааччы, тылбаасчыт Николай Денисович Неустроев төрөөбүт күнүн чэрчитинэн библиотекаҕа араас хабааннаах тэрээһиннэр, көрсүһүүлэр, уруоктар буоллулар.
Дьокуускай куорат 1-гы №-дээх орто оскуолатын 9-с кылааһын үөрэнээччилэригэр суруйааччы туһунан «Дьиҥ сахалыы дириҥ, анааран көрөр өйдөөх-санаалаах киһи этэ...» диэн темаҕа уруок буолан ааста. Бу уруокка оҕолор Николай Денисович олоҕун, айар үлэтин кытта билистилэр, сайтка оҥоһуллубут «Пьесы, рассказы и очерки Неустроева вошли в золотую сокровищницу якутской литературы» виртуальнай выставканы көрдүлэр.
«Айыы Кыһата» национальнай гимназия 8-с кылааһын үөрэнээччилэригэр «Тиэтэйиэҥ, дьону күллэриэҥ... », суруйааччыга аналлаах квиз-оонньуу ыытылынна. Оҕолор икки хамаандаҕа арахсан, үс түһүмэхтээх оонньууга кытыннылар:1) Суруйааччы олоҕун таайыах 2) Толкуйдуур, суоттуур сорудахтар 3) Суруйааччы айымньыларыттан быһа тардыы. Оонньуу түмүгүнэн кыайыылаахтар билиннилэр. Маннык оонньуу-уруокка оҕо олус элбэҕи ылынар, билэр.
Николай Денисович олоҕун, айар үлэтин, сыдьааннарын туһунан кэпсиир олус интириэһинэй быыстапка оҥоһулунна. Быыстпакаҕа суруйааччы бииргэ төрөөбүт балтын Федора Денисовна сиэнэ Михаил Гаврильевич Гоголев дьиэ кэргэнинэн муспут материаллара, хаартыскалара туруорулунна. Хаартыскалар, докуменнар Анна Денисовна Неустроеваттан Акулина Михайловна Неустроеваҕа хаалбыт архива эбит. Михаил Гаврильевич бэйэтэ мас оҥоһуктары, музыкальанай инструменнары оҥоруунан дьарыктанар уус.
Үгэскэ кубулуйбут сыл аайы ахсынньыга саха литературатын төрүттэспит классик суруйааччы Николай Денисович Неустроев аатынан литература бириэмийэтин туттарыллыыта быйыл Н.Д. Неустроев аатынан SMART-библиотекаҕа буолла. «Саха сирин суруйааччыта» ассоциация тэрийэр, эдэр суруйааччылары бэлиэтиир литература бириэмийэтин бэһис лауреатын үрдүк аатын быйыл Таатта улууһун, Дьохсоҕон нэһилиэгиттэн төрүттээх, эдэр драматург Утум Захаров ылла. Бириэмийэ хамыыһыйатыгар «Саха сирин суруйааччыта» ассоциация бэрэссэдээтэлэ Олег Сидоров, П.А. Ойуунускай аатынан литература музейын дириэктэрэ Николай Лугинов, Саха сирин суруйааччыларын сойууһун бэрэссэдээтэлэ Гаврил Андросов, Саха Өрөспүүбүлүкэтин суруйааччыларын сойууһун бэрэссэдээтэлин эбээһинэһин толорооччу Владислав Доллонов киирэллэр.
Кэлэр 2025 сылга суруйааччы төрөөбүтэ 130 сыла буоларынан, Николай Денисович аатын үйэтитиигэ төгүрүк остуол буолан ааста. Кэскиллээх кэпсэтии кэннэ суруйааччы аатын үйэтитиигэ элбэх үлэ ыытыллара былааҥҥа киирдэ.
Саха суруйаччыларын туһунан кэпсиир, билиһиннэрэр уруоктарбытын өйүүр саха тылын уонна литературатын учууталларыгар Анна Даниловнаҕа уонна Светлана Афанасьевнаҕа, маннык үрдүк таһымнаах тэрээһиннэрбитигэр кыттар ааҕаччыларбытыгар, дьоммутугар махтанабыт.
