Кулун тутар 1 күнүгэр «Кэпсээ» кулууппут иhэ истиҥ салгынынан туолла. Бу күн биһиги түмсэн, СӨ литературнай түмсүүтүн чилиэнэ, норуот сөхтөрөр киһитэ Любовь Федотовна Никитина-Тапталаананы кытта «Куйаартан кутуллар дьүрүскэн» диэн саҥа кинигэтин дьоро киэһэтигэр мустубуппут.
Кинигэ аата хас биирдии киһи дууһатын ыытар, толкуйдатар. Бу хомуурунньукка ааптар араас сылларга төрөөбүт дойдутун кэрэ айылҕатын, олох уустук суолларын, киһи ис туруутун, ол иһигэр таптал күүһүн туһунан суруйбут хоһоонноро уонна кини тылыгар айыллыбыт ырыалара киирбиттэр.
Любовь Федотовна поэт эрэ буолбакка, композитор быһыытынан эмиэ биллэр. Кинигэҕэ киирбит ырыалар ааптар бэйэтин толоруутугар дорҕооннонон, биһигини барыбытын сэгэттэ. Ону тэҥэ, бу киэһэҕэ ыалдьыттарбыт Петр Макаров, Маргарита Осипова, Василий Слепцов, Зоя Прокопьева эмиэ ыллаан, тэрээһини киэргэттилэр. Оттон киэһэни баяҥҥа Афанасий Филиппов уус-уран доҕуһуоллаан, ырыаларга ордук кэрэтик тыын кутурда.
Тэрээһин бырагыраамата тус-туспа суолталаах ырыалартан тугуллан, сааскы бастакы күҥҥэ, Аан дойду дьахталларын күнүгэр ананан ыытылынна. Сылаас тыллаах, дууһаҕа киирэр бытаан ырыалар, баян чуумпу доҕуһуола дьону угуйан, ыалдьыттарбыт истиҥник вальстаан, киэһээҥҥи түһүлгэни ордук уратылык аастылар.
Маннык тэрээһиннэр төрөөбүт тылбытын, литературабытын, норуот айар күүһүн сэргээн, үрдүктүк тутарбытыгар улаханнык көмөлөһөллөр. Любовь Федотовнаны саҥа кинигэтинэн эҕэрдэлиибит уонна айар үлэтигэр ситиһиилэри баҕарабыт!
