Өбүгэлэрбит хоту дойду кыыдааннаах кыһынын тымныытыгар, кыараҕас балаҕаннарыгар хаайтаран да олордоллор, фольклор араас көрүҥүн сайыннаран кэлбиттэрэ. Саха норуотун уус-уран айымньытын чыпчаала буолбут олоҥхобутун кытта тэҥҥэ умсулҕаннаах оонньуу оҥостон оһуохайы олохтоон, эһиэхэйи иитиэхтээн олорбуттара.
Саха сирин тыйыс айылҕалаах, уһун тымныылаах кыһынын этэҥҥэ кыстаан, самаан сайын кэлиитигэр күөххэ үктэммиччэ алаастарынан мустан, айыллыбыт аар айылҕаларыгар оһуохай түһүлгэтин төрүттүүллэрэ.
Саха төрүт үҥкүүтүн «Оһуохайы» харыстыыр уонна тарҕатар сыаллаах-соруктаах Саха Өрөспүүбүлүкэтин Ил Дархана Айсен Николаев балаҕан ыйын 7 күнүгэр 2024 сыллаахха Оһуохай күнүн олохтуур туһунан Ыйаахха илии баттаабыта, онон Оһуохай күнэ ыам ыйын 25 күнүгэр бэлиэтэнэр.
Оһуохай күнүн көрсө Н.Д. Неустроев аатынан SMART-библиотекаҕа Айыы Кыһатын 3-с кылааһын үөрэнээччилэригэр «Оһуохайы оройуттан тутуохха» диэн тэрээһин буолан ааста. Бастаан оһуохайга киириэхпит иннинэ Ольга Матвеева салайыытынан сөпкө тыыныыга уонна куоласпытын арыйаары кылыһах эрчиллиилэрин оҥордубут. Түһүлгэбитин тэринэн баран оһуохай араастарын, хаамыытын үөрэттибит. Түһүлгэбитигэр былыргылыы, сарын, Бүлүүлүү, Таатталыы, Найахалыы оһуохай көрүҥнэрин оройуттан туттубут. Онон оҕолор түөлбэ оһуохайын арааһын, хаамыытын билэн бардылар, астыннылар, саҥаны көрдүлэр-иһиттилэр.
Маннык хабааннаах тэрээһиннэр, уруоктар оҕоҕо, ыччакка саха норуотун культуратын, историятын үөрэтиигэ олус тиийимтиэлэр, туһалаахтар.
