Мин 15 №-дээх «Моя библиотека» о5о библиотекатыгар 2002 сылтан 2011 сыллаахха диэри абонемент сэбиэдиссэйинэн үлэлээбитим. Салайааччыбыт Матрена Николаевна биhиэхэ чопчу сыалы – соругу туруорар буолан, араас өруттээх үлэбит кэмигэр туолан иһэрэ. Бастаан ааҕааччылары кытта биир тылы булан, хайа оҕо тугу сөбүлээн ааҕарын – көрөрүн, интэриэhиргиирин үөрэппитим. Дьокуускай куорат 2 №-дээх оскуола учууталларын Елизавета Михайловна Малышеваны, Лидия Дмитриевна Кривошапкинаны, Ольга Михайловна Татаринованы, 26 №-дээх оскуола саха тылын учуутала Марианна Николаевна Борисованы, Морук Лена Андреевнаны кытта олус тапсан биир санаанан үлэлээбиппит. Ону таhынан төрөппүттэр мунньахтарыгар куруутун кыттарбыт. 10№-дээх «Туллукчаан» детсады кытта договор быhыытынан хас да группаҕа көhө сылдьар пуннары үлэлэппиппит.
2004 сылтан орто уонна улахан саастаах оскуола оҕолоругар «Аргыс» кыраайы үөрэтэр кулууп былааннаахтык үлэлээбитэ. Ол курдук сиэр-майгы өттүгэр оҕолор сөбүлүүр суруйааччылара Амма Аччыгыйа, Петр Тобуруокап кэпсээннэринэн аахпыты дьүүллэhии, түмүк оҥорооhуннар, литературнай викториналар көхтөөхтүк ыытыллыбыттара: «Олонхо Боотура - уол оҕо», «Саха кыыhа - сир сиэдэрэй симэҕэ» 7-8 кылаастарга, «Ийэ эйэҕэс мичээрэ, сүрэхпит сылааhа», «Ийэ уобараhа саха сирин суруйааччыларын айымньыларыгар» литературнай бырааhынньык 5-6 кылаастарга, «Таптыыр күндү киhибэр - ийэбэр сурук» өйтөн суруйуу уонна да атыттар.
Айыл5а харыстааhынын декадатыгар бэрт тэрээhиннээхтик кыттарбыт. Ол курдук, «Великая река Лена» экоуроктар, «Берегите воду!» - плакаттар конкурстара ыытыллыбыттара. Ону тэҥэ, №2 оскуолатын 6Д кылааһын үөрэнээччитэ Осипов Ваня «Өлүөнэ өрүс» диэн хоhооно «Страна серебрянных струй» оҕолор творческай конкурстарыгар ситиhиилээхтик кыттыбыта
Патриотическай тыыҥҥа иитиигэ улахан болҕомтону ууруллара. Ол курдук, «Символика Родины» поэт-буойуннар айымньыларынан кинигэ выставката, бэсиэдэлэр, викториналар, «Улуу сэрии уотугар уhаарыллыбыт эйэни - дьолу тутуспут поэт-буойун» Степан Тимофеев 90 сааhыгар анаан литературно-музыкальнай композиция ыытыллыбыттара.
Былаан үксэ календарнай бэлиэ датанан оҥоhуллара. Онон биир да событие, дата, үбулүөй болҕомтото суох хаалбат этэ. Бу улэбит олус эппиэтинэhи, элбэх ааҕыыны, билиини эрэйэрэ. Библиотечнай уруоктар «Книга в моей жизни», «О книге и библиотеке», «История книги», «Библиотека, или город твоих друзей», уруhуй конкурстара «Библиотека моей мечты», «Книга, о которой я хочу рассказать», «Как я впервые пришла в библиотеку» элбэх о5о кыттыытын ылбыттара. Олус көхтөөх кыргыттар Иванова Нарыйа, Лиза Мигалкина, Таня Корякина «Я и моя любимая книга» өйтөн суруйуулара киэҥ биhирэбили ылбыттара.
Тиhигин быспакка араас тематическай кылаас чаастарын, тылынан тахсар сурунааллары, суруйааччылары кытта көрсүhүүлэри, араас литературнай ааҕыылары тэрийэрбит. Ол курдук о5о суруйааччыта, Саха Өрөспүүбүлүкэтин норуодунай поэта И. В. Мигалкины, филологическай наука кандидата Ю. И. Васильевы – Дьаргыстайы, профориентацияҕа ЯГУ экомикаҕа кафедратын доценын П. И. Васильевы уонна да атыттары кытары умнуллубат көрсүhүүлэри ыыппыппыт.
«Кэскил» хаhыаты оҕолорго пропагандалыыр сыаллаах сурутуу акцияҕа кыттан 100% хаhыакка суруйтарбыппыт. Ол курдук “Юность Севера” хаhыат 70 сылыгар анаан 2 №-дээх оскуола үөрэнээччилэрэ, «Аргыс» кулууп активнай чилиэннэрэ эҕэрдэлэрэ бырааhанньыктааҕы балаhаҕа бэчээттэммитэ. Ыытыллар тэрээhиннэргэ оҕолор көхтөөхтук кыттаннар элбэх бириистээх миэстэҕэ тиксэллэрэ.
Ааҕааччыны бэйэҕэ ыксары тардан, кинигэ аптаах эйгэтигэр киллэрии, кинини кытта биир санааҕа кэлии – бу сурдээх улахан психологическай үлэттэн тахсар. Библиотекаҕа кэлбит оҕону хайдах көрсөртөн барыта тутулуктаах, ордук улахан кылаас оҕолоро. Кинилэри кытта деловой литературанан эрэ буолбакка, олох-сиэрдээх тематыгар, бастакы таптал, айылҕаҕа, төрөөбүт сиргэ таптал туhунан киэн кэпсэтиилэри ыытарбыт. Ол түмүгэр «Мои первые стихи о любви» 2№-дээх оскуола 8 Г кылааһын үөрэнээччилэрэ Леончук Лера, Семенова Люба хоhоонноро тэттик электроннай кинигэҕэ бэчээттэммитэ.
Бу үлэҕэ библиотекарь-технолог Сыроватская Саргылана Афанасьевна улахан болҕомтотун ууран, бэркэ табыллан тахсыбыта.
Младшай абонеменна Татаринова Марфа Павловнаны кытта бииргэ улэлээбиппиттэн сүрдээҕин астынабын. Кини оҕолорго кинигэ дириҥ билиини биэрэрин, хас бирдии оҕо истиҥ доҕоро, өйдөөх сүбэhитэ буоларын тиийимтиэ тылынан итэҕэтиилээхтик кэпсиирэ. Хайдахтаах курдук Юрий Гагарин туhунан уруок ыыппытын куруутун долгуйа ахтабын.
Аҕыйах да кэм буоллар бу дьоҕус, кыракый библиотекаҕа улэлээбиппинэн астынабын, киэн туттабын. Аата даҕаны «Моя библиотека» бэрт элбэҕи эрэннэрэр билии биhигэ. Ааҕааччы олоххо бэлэмнээх киhи буола улаатарыгар библиотека сэбиэдиссэйэ Матрена Николаевна Аргунова, библиотекардар Евдокия Хрисияновна Васильева, Марфа Павловна Татаринова, Анастасия Афанасьевна Сергеева, Саргылаана Афанасьевна Сыроватская күүстэрэ кыайарынан күүс көмө буолаллара, өрүү түбүк үөhугэр сылдьаллара.
Махталлаах ааҕааччыларбын өрүү истиҥник саныыбын. Туохха эмит табыллыбатахтарына, эбэтэр үөрэн, долгуйан кэлэн сонуннарын кэпсии-ипсии тураллара харахпар бу баар. Эбэтэр уулуссаҕа ыраахтан көрөн, дорооболоhо охсоору сүүрэн кэлэллэрэ бу миэхэ дьол буолара. Оччоҕо бу идэбин сөпкө тайаммыппын дуу диэн санаа киирэр.
Библиотека коллективыгар баҕарыам этэ өссө да таhаарыылаах улэни, саҥа бырайыактары, элбэҕи интэриэhиргиир ааҕааччыгыт ахсаана үксүү турдун.
