Хохуоралаах тыллаах,
Хоҥкунас тыастаах,
Холобура суох хоһоонноох
Хомус барахсаны
Хомуһуннаан айбыта үһү.
Куйаар хомус
Кулун тутар 12 күнүгэр Нам улууһун култууратын киинигэр, З.П Винокуров аатынан Намнааҕы оҕо искусствотын оскуолата тэрийэн ыыппыт аан маҥнайгытын аһаҕас хомуһунан дьүһүйүү «Куйаар хомус» диэн күрэс буолан ааста. Күрэскэ Мэҥэ Хаҥаластан, Уус Алдантан, Дьокуускайтан, Нам улууһун нэһилиэктэриттэн кэлэн кыттыыны ыллылар.
Ол курдук Н.Д Неустроев аатынан Дьокуускайдааҕы кииннэммит SMART-бибилэтиэкэ иһинэн үлэлиир SMART-этно устуудьуйа «Төрүт дорҕоон» куурус иитиллээччилэрэ «Далбар» ансаамбыл «Күн үҥкүүтэ» айымньынан ситиһиилээхтик кыттан I Үрдэли ылан ситиһии аргыстаах, кыайыы кынаттаах кэллэ.
«Далбар» ансаамбыл 2021 сыллаахха «Хомус алыптаах дорҕооно» куурус чэрчитинэн тэриллибитэ. Бу сыллар тухары араас таһымнаах күрэстэргэ кыттан кэккэ ситиһиилэрдээх. Ону таһынан оҕолорго аналлаах «Тыгыйык» ансаамбыл 2024 сылтан үлэлиир.
«Хомус алыптаах дорҕооно» куурус саҥа саҕалааччы хомусчут оҕолорго уонна улахан дьоҥҥо ананан 2019 сыллаахтан үлэтин саҕалаабыта. Бу манна ким хомустуон баҕалаах нэдиэлэҕэ биирдэ кэлэн дьарыктанар. Араас улуустартан, куорат олохтоохторо хомус алыптаах дорҕоонугар уһуйуллан кэллилэр.
