Умна быһыытыйбыт суруйааччыбыт Валентина Гаврильева аатын уонна кини «Уот Дьулустаан» сэһэнин киэҥ эйгэҕэ таһаарбыт, айымньыны саҥалыы тыыннаабыт Саха НКИК хампаанньа сериал сулууспатын литературнай редактора, сценариһа Катерина Григорьева-Кэрэмэс Сыдьаайы кытта көрсүһүү Кыраайы үөрэтэр В.Г.Белинскэй аатынан бибилэтиэкэҕэ буолла.
Кини «Уот Дьулустаан» сэһэҥҥэ олоҕуран, 5 сыл устата иитиэхтээн суруйбут саха кута иҥмит сценарийын уонна Валентина Гаврильева айымньытын тула кэрэхсэбиллээх кэпсэтии мустубут дьон болҕомтотун тарта. Бу айымньы – дириҥ ис хоһоонноох уустук сэһэн уонна киинэлэр, театральнай туруоруулар уус-уран айымньыга олоҕуран туруорулуннахтарына, көрөөччү ордук сөбүлүүр, дууһатынан ылынар диэн ааҕааччылар санааларын үллэһиннилэр.
Мустубуттар суруйааччы айымньыларынан туруоруллубут быыстапкаттан үгүс кинигэлэри уларсан, фотослайдтары көрөн, санааларын сайа этэн, боппуруостарыгар толору эппиэттэри ылан, көрсүһүүттэн астынан тарҕастылар.
Валентина Николаевна Гаврильева биллиилээх, ураты көрүүлээх, туспа суоллаах - иистээх айымньылардаах суруйааччы. 1973 сылтан ССРС суруйааччыларын Сойууһун чилиэнэ, СӨ культуратын үтүөлээх үлэһитэ. Саха дьахталларыттан бастакынан М.Горькай аатынан Литература институтун бутэрбитэ.
