Тыыннаах быыстапка[12+]

Кыраайы үөрэтэр В.Г. Белинскэй аатынан бибилэтиэкэҕэ «Коллекции горожан» (Дьокуускай куорат чааһынай коллекционердарын быыстапката) – диэн быыстапкалар бырайыактарын иhинэн «Өбүгэ оонньуулара» диэн «тыыннаах быыстапка» аһыллыыта буолла.


Манна Арассыыйа Федерациятын үөрэҕириитин бочуоттаах үлэһитэ, Учууталлар учууталлара, РТИП уонна МСРИ эбии үөрэхтээһинин учуутала Капитолина Михайловна Алексеева коллекциятыттан саха төрүт оонньууларын тэриллэрэ, кинигэлэрэ турдулар. Коллекционер ис-сүрэҕиттэн үлүһүйэн муспут коллекциятын ымпыгар-чымпыгар тиийэ кэпсээтэ, хайдах оонньуулларын көрдөрдө, мустубут дьону күрэхтэһиннэрдэ.


Кини өссө кыыл-сүөл, көтөр-сүүрэр уҥуохтарыттан, туйахтарыттан арааһынай остуол оонньууларын бэйэтэ айан оҥорбутун үллэстэн, улахан сэҥээриини ылла.


Култуура үлэһиттэрин профсоюһун Спартакиадаларын бирииһин кыайыылаҕа Валентин Афанасьевич Иванов хаамыскаҕа, хабылыкка маастар-кылаас ыытан тэрээһин кыттыылаахтарын интэриэһин тарта. Быыстапка аһыллыыта Семенова Хаарчаана кырыымпатын дьикти дорҕоонунан, уруйдардаах оһуокайынан, Айталина Винокурова кынаттаах тойугунан доҕуһуолланна.

Убаастабыллаах куорат олохтоохторо уонна ыалдьыттара, быыстапка атырдьах ыйын 14-20 күннэригэр өрөбүл күнтэн ураты 10-18 ч. диэри үлэлиир. Көрөргүт таһынан, манна сахалыы остуол оонньууларын оонньуоххутун, төрүт оонньуулар тустарынан ааҕыаххытын сөп. Киириитэ босхо. Кэлиҥ, көрүҥ, оонньооҥ!

 Екатерина Попова, сүрүннүүр бибилэтиэкэр