Саҥарыахха сөп хас да тылынан,
Онтон толкуйдуугун биир тылынан!...
Төрөөбүт төрүт тылбыт түҥ былыргыттан дириҥ силистээх-мутуктаах, ураты баай, хомоҕой, ылбаҕай тыл буоларын бэркэ диэн билэбит. Олох хаамыыта хайа да үйэҕэ сиэркилэ курдук тылга көстөр диэн мээнээҕэ эппэттэр. Кистэл буолбатах билиҥҥи кэмҥэ, ордук эдэр көлүөнэ төрөөбүт төрүт тылынан көҥүллүк сайа саҥарара ахсааннаах буолла диэн бэлиэтии көрөбүт. Онтон сиэттэрэн Кыраайы үөрэтэр бибилэтиэкэҕэ эдэр ыччакка анаан «Saqalɯ: sudurgutuk» диэн төрөөбүт тылбытын харыстыыр, сайыннарар сыалтан эдэр көлүөнэҕэ анаан бэрт сэргэх интерактивнай оонньууну толкуйдаан, тобулан ыыттыбыт. Биһиги оонньуубут сүрүн сыалынан төрөөбүт төрүт тылбытынан ыраастык, табатык саҥарарга дьулуһуу, ситиһии буолар.
Ол курдук, сэтинньи 27 күнүгэр Дьокуускайдааҕы Коммунальнай тутуу орто үөрэх кыһатын устудьуоннара көхтөөх кыттыыны ылан үөрүү көтөллөөх тарҕастылар.
Оҕолор оонньуу хаамыытынан 3 түһүмэххэ күөн көрүстүлэр: 1 түһүмэххэ, төрөөбүт тылынан уустаан-ураннаан ыраастык таба саҥарыыга дьулустулар, 2 түһүмэххэ, биир дорҕоонтон тахсар тыллары толкуйдаатылар, 3 түһүмэххэ, КВИЗ хаамыытынан, түөрт араас бөлөхтөргө баар ыйытыктарга сөптөөх хоруйдары биэрдилэр.
Оонньуубут биир тыынынан, тэтимнээхтик ааста. Оҕолор олус диэн дуоһуйдулар, билиилэрин хаҥаттылар.
Маннык оонньуу үгэскэ киллэрэн Кыраайы үөрэтэр салаа үлэһиттэрэ сахалыы тыллаах, сахалыы толкуйдаах, саха тылын сайдарын туһугар туруулаһар үүнэр көлүөнэни, эдэр ыччаттары ыҥырар.
Онон, күндү доҕоттор, иитиллибит ийэ тылбытынан истиҥник-иһирэхтик иилэһэн, сахабыт сайдам саҥатынан сайаҕастык сайа тыынан төрөөбүт төрүт тылбытын харыстаан төлкөтүн түстүөҕүҥ, удьуору утумнаан уу сахалыы тыллаах буолуоҕуҥ диэн ыҥырабыт!
