Бибилэтиэкэҕэ саха литературатыгар бастакы уонна соҕотох «Биһиги тыыннаахпыт!» диэн Аҕа дойду Улуу сэриитин тиэмэтигэр суруллубут арамаан ааптара Саха норуодунай суруйааччыта Елена Васильевна-Куорсуннаах ааҕааччыларбытын кытта атах тэпсэн олорон кэпсэттэ.
Бу олус намчы, кэрэ киһи хайдахтаах курдук эр санаалаах, эр киһи да кыайан ылсыбатаҕын ылсан, кыайа тутан, норуоппутун урдэтэр айымньыны суруйбутун бары бэлиэтээн эттилэр.
Арамааҥҥа Дьокуускай куораттааҕы Өрүс тиэхиньикумун устудьуона, Сэбиэскэй аармыйа эписиэрэ Василий Данилович Лукин уонна кини 468-с стрелковай полката бииргэ сулууспалаабыт доҕотторун фроннааҕы олохторун чуваш доҕордоро Павел Никифорович Никифоров ахтыы тэтэрээтигэр суруйбутугар олоҕуран кэпсэнэр.
Иккис ыалдьыт кинигэ сүрүн дьоруойун Лукин Василий Данилович уола Лукин Андриян Васильевич аҕатын туһунан истиҥник аҕынна.
Рустам Каженкин-Арчы Уола, бэйиэт, Саха сирин уонна Россия суруйааччыларын сойуустарын чилиэнэ, маннык көрсүһүүлэр, кэпсэтиилэр ааҕааччыларга, нэһилиэнньэҕэ ордук чугас, наадалаах буолалларын биһирээн бэлиэтээтэ.
79 саастаах, Лукин Егор Егорович, кинигэ сүрүн дьоруойун чугас аймаҕа, Лукин Василий Данилович сэрии кэнниттэн олоҕун сырдатта, бу арамаан дириҥ ис хоһоонноох, саха хорсун саллааттарыгар кэриэс-өйдөбүнньүк кинигэ диэн эттэ.
Ленинградтааҕы Н.К.Крупская аатынан култуура институтун бүтэрбит Куорсуннаах сүгүрүйээччилэрэ Сивцева Антонина Петровна, Вешникова Марфа Романовна (Баал Хабырыыс кийиитэ), Айталина Турантаева арамаан философскай, историческай, политическай, режиссерскай өттүлэриттэн кыайа тутуллан суруллубут айымньы буоларын эттилэр.
Винокурова Мария Иннокентьевна Куорсуннаах гражданскай эппиэтинэһин үрдүктүк тутан, маннык арамааны суруйан таһаарда диэн бэлиэтээтэ.
Корнилова Октябрина Николаевна, библиотечнай волонтер, историябытын суруйааччы маннык уус-уран айымньы оҥорон суруйдаҕына, өссө театрдарга турара буоллар ыччаттарбыт өссө ордук билиэ этилэр диэн баҕа санаатын этэн туран, бэйиэт Эдуард Корнилов «Бэтэрээн эһэм» хоһоонун нууччалыы-сахалыы ааҕан, мустубуттары долгутта.
Бибилэтиэкэрдэр бу айымньыга анаан оҥорбут кинигэ кыбытыыларыгар айымньыттан быһа тардыылары киллэрбиттэрин, ааҕааччылар доргуччу ааҕан иһитиннэрдилэр.
«Биһиги тыыннаахпыт!» арамаан туһунан киэҥ суолталаах көрсүһүүттэн мустубут дьон үгүһү билэн-көрөн, астынан тарҕастылар. Бу кинигэни бибилэтиэкэлэртэн уларсан ааҕыаххытын сөп.
