«Эн саамай сүрүн хапсыһыыга, олоххо, хотон, спортка эргилиннин. Онтон атын улахан кыайыы баар буолуон сатаммат». Бу сүрүн дьоруой доҕоругар эппитэ айымньы батыһар идеята буолар.
В. Г. Белинскэй аатынан Кыраайы үөрэтэр бибилэтиэкэҕэ саха норуодунай суруйааччыта Неймохов Егор Петрович «Хапсыһыы» сэһэнин тула кэпсэтии «Билсин: суруйааччы уонна кини кинигэтэ» бырайыак уонна XVIII Норуоттар икки ардыларынааҕы спортивнай «Азия оҕолорун» оонньууларын чэрчилэринэн ааҕааччыларга анаан ыытылынна.
Чопчу бу айымньыны талан ылыыбыт хас да кэккэ биричиинэлээх:
– саха уус-уран литературатыгар спорт тиэмэтигэр аан-бастакы айымньы буолар;
– бэчээккэ тахсыбыта 40-ча сыл ааста да, айымньы ис хоһооно сибилигин уһулуччу суолталааҕа билиннэ;
– ааптар олоҕун аргыһа Неймохова Мария Петровна коллегабыт, элбэх сыл Дьокуускайдааҕы бибилэтиэкэлэр ситимнэригэр ОФиК салаатын салайбыта;
– сэһэҥҥэ В. Г. Белинскэй аатынан бибилэтиэкэтэ кыратык да буоллар ахтыллар.
Көрсүһүү ыалдьыттара Неймохова Мария Петровна,Илларионов Василий Васильевич, Друзьянов Михаил Егорович (видео нөҥүө), Васильев Герасим Семенович, Татьяна Петровна Карпова көрсүһүү кыттыылаахтарыгар Егор Петрович Неймохов спортка сыһыанын, спортсменнары кытты алтыһыыларын, устудьуоннааҕы сылларын, «Хапсыһыы» айымньыны хайдах суруйбутун, айымньы саҥа тахсан, «буруолуу» сылдьан Саха театрыгар туруоруллубутун, сүрүн уобараска төрүөт буолбут Вячеслав Павлович Карпов айымньыны хайдах ылыммытын туһунан сиһилии, олус киэҥник сэһэргээтилэр.
«Хапсыһыыга ахтыллыбыт кинигэлэр» диэн быыстапка полкатын сырдатыы мустубут дьон-сэргэ интэриэһин тарта диэн бэлиэтиэххэ наада.
Кырдьыктаах сыанабылы хаһан баҕарар ааҕааччы биэрэр, быһар. «Хапсыһыы» айымньы киһи кутун-сурун таарыйар,норуот олоҕун, кыһалҕаларын кырдьыктаахтык көрдөрөр буолан ааҕааччы сөбүлээбитэ, ылыммыта. Неймохов Егор Петрович норуотун үөрүүтүттэн, кыайыытыттан үөрэн, норуотун баҕатын таба таайан, бу маннык уһулуччулаах айымньы суруйбут, онон ыччаты иитиигэ, ыччат бэйэтин суолун олоххо булунарыгар улахан сабыдыаллаах айымньы – диэн түмүк оҥоһулунна.
Неймохова Мария Петровна,Илларионов Василий Васильевич куорат бибилэтиэкэлэригэр суох аҕыйах экземплярдаах бэйэлэрин кинигэлэрин бэлэхтээн үөртүлэр.
