«…Билии биэрбит биибилийэм: илгэ үүтүн испит ийэм,
айар тылбын аспыт аҕам, сырдык ырам, үрдүк баҕам –
киһи тахсар гына ииппит кинигэм барахсан эбит!»
Сэмэн Тиитэбис Уруупап
«АЙАР» КЫҺАТЫН 100 СЫЛЛААХ ҮБҮЛҮӨЙҮГЭР АНАЛЛААХ КӨРСҮҺҮҮ
Быйылгы 2026 сыл – өрөспүүбүлүкэбит култуурунай олоҕор суолталаах сыл. Саха сирин кинигэтин тыынын иитэр «Айар» национальнай кинигэ кыһата 100 сыллаах дьоһун үбүлүөйүн бэлиэтиир. Бу үөрүүлээх күнү көрсө, муус устар 3 күнүгэр В. Г. Белинскэй аатынан Кыраайы үөрэтэр библиотека «Кинигэ – үйэлээх бэлэх» диэн ураты көрсүһүүнү тэрийэн ыытта.
Сахалыы кинигэни тарҕатыыга, ааҕыы культуратын сайыннарыыга уонна суруйааччылары кытта алтыһыыга сыаллаах-соруктаах буолла. Онон, бу дьоро киэһэни саха литературатын, култууратын кытары ситимнээх ааҕааччылар, суруйааччылар уонна «Айар» кинигэ кыһатын айымньылаах кэлэктиибэ бииргэ атаардылар.
Үбүлүөйдээх тэрээһиҥҥэ «Айар» кыһатын салайааччыта Август Васильевич Егоров уонна кини солбуйааччыта Валерий Николаевич Луковцев саха бэчээтин баай устуоруйатын туһунан кэпсээтилэр. Кинилэр П. А. Ойуунускай, Күндэ, Амма Аччыгыйа, Эллэй, Күннүк Уурастыырап курдук улуу суруйааччыларбыт саҕалаабыт үтүө үгэстэрэ бүгүн «Айар» кыһатыгар хайдах салҕанарын, инники былааннарын билиһиннэрдилэр.
Анал бырайыактар салаатын эрэдээктэрэ Айсена Тимофеева уонна таһаарыылар эрэдээктэрэ Алина Бурцева кинигэ бэчээттэниитин кистэлэҥнэрин арыйдылар. Презентация нөҥүө кинигэттэн ураты, ааҕааччыга анаан таһаарыллыбыт анал оҥоһуктары, бэлэхтэри көрдөрөн сөхтөрдүлэр.
Тэрээһин саамай күүтүүлээх чааһа – талааннаах суруйааччыларбыт Дмитрий Пономарев-Дьолуолаах, Василий Гоголев-Уйулҕан, Евдокия Иринцеева-Огдо уонна саха эстрадатын артыыһа Александр Бурнашов бэйэлэрин айымньыларын, айар үлэ туһунан кэпсээннэрин үллэһиннилэр. Автограф-сессия кэмигэр ааҕааччылар сөбүлүүр ааптардарыттан илии баттааһын ылан, өйдөбүнньүк хаартыскаҕа түстүлэр.
Кэрэ киэһэ түмүгэр, эрэллээх ааҕааччыларбыт анал номинацияларынан чиэстэннилэр. Бибилэтиэкэрдэр бэйэлэрэ оҥорбут кинигэ закладкаларын бэлэхтээн, «Айар: 100 сыл бииргэ» быыстапканы билиһиннэрэн, мустубут дьону кинигэ алыптаах эйгэтигэр угуйдулар. Ааҕааччылар саҥа санааларынан байан, илии тутуурдаах, астынан-дуоһуйан тарҕастылар.
Бу тэрээһин кинигэни ааҕарга, билиигэ тардыһарга улахан өйөбүл буолла. «Айар» национальнай кинигэ кыһатын кэлэктиибигэр айар аартыккыт арыллан истин, саҥа саҕахтары, үрдүк ситиһиилэри баҕарабыт! Бу курдук дьоро түгэннэр өссө да элбии турдуннар!
Кэлиҥ, кинигэни ааҕыҥ, кэрэни кэпсэтиҥ!
