Продолжаем рубрику «Профессия вечная – библиотечная», приуроченную к 50-летию Детской библиотеки – филиала №15 «Моя библиотека». Своим приятным отзывом делится читатель нашей библиотеки – заслуженный работник социальной защиты населения РФ, ветеран педагогического труда Тамара Петровна Уваровская.
Дьокуускай куорат Чернышевскай уулуссатыгар «Моя библиотека» оҕо библиотекатыгар сиэним «Туллукчаан» оҕо саадыгар сылдьар эрдэгиттэн сылдьабыт.
Оччоттон баччаҕа диэри наһаа сэмэй үчүгэй үлэһиттэр үлэлииллэр.
Урут сэбиэдиссэйинэн Клавдия Ильинична Максимова - Сайыына үлэлээн саҕалаабыт, онтон өр кэмҥэ Матрена Николаевна Аргунова үлэлээбитэ. Кини олус эйэҕэс үлэһит, оҕолору ис дууһатыттан таптыыр элэккэй киһи. Кини салалтатынан араас ис хоһоонноох тэрээһиннэр, көрсүһүүлэр буолаллар. Библиотека иһэ куруук оҕонон толору буолар.
Итини тэҥэ куорат араас культурнай тэрээһиннэригэр кыттыыны ылаллар, бэйэлэрэ да араас викториналары, интерактивнай оонньуулары ыыталлар.
Матрена Николаевна үөрэтэн, такайан, үүннэрбит үлэһиттэрэ билигин бэркэ үлэлии сылдьаллар.
Кинини солбуйан хаалбыт Мария Егоровна Сивцева бастыҥ салайааччы, коллектива дьоһуннаах үлэһиттэр, бары да талбыт курдук оҕо ааҕыытын өрө туппут специалистар.
Библиотека ааныттан саҕалаан, киирбит оҕону, киһини үөрэ-көтө көрсөн, наадыйар кинигэлэрин сүбэлээн-амалаан биэрэллэр. Кырачаан ааҕааччылары дууһаларын көөнньөрдөр, үтүө дьон!
«Моя библиотека» библиотечнай үлэ ветераннарыгар уһун дьоллоох олоҕу, үлэһиттэригэр кэрэни, сырдыгы сыдьаайар үлэҕитигэр ситиһиилэри, элбэх ааҕааччыны, саҥа сүүрээннэри уонна Дьокуускай куоракка саҥа оҕо библиотекатын дьиэтэ тутуллан, үөрүүгүт үксүүрүн баҕарабын.
