Төрөөбүт тыл хомуһунун иҥэриммит айар куттаах дьоммут Галина Нельбисова, Анна Варламова-Айысхаана, Данил Макеев - билиҥҥи проза биллэр-көстөр суруйааччылара «Книга-03» библиотекаҕа ыалдьыт буолан ааҕааччылары кытта көрүстүлэр. Төрүт тыл умсугутуулаах, угуйар күүһүгэр абылатан хайдах айымньы айылларын, иэйии киирэрин, туох кистэлэҥнээҕин арыйдылар, кэпсээтилэр. Ол курдук, Анна Егоровна тус бэйэтигэр дьыл кэмэ сабыдыаллыырын бэлиэтиир. Ыам ыйыгар, үрүҥ түүннэр үүнүүлэрэ утуйбакка айар-суруйар эбит. Оннук турук ахсынньы ыйга эмиэ уһуктарын бэлиэтиир. Галина Нельбисова үлэтин саҕалаата да бүтэрэр санааттан түүннэри-күнүстэри суруйар, онтон Данил Николаевич ордук күһүн, халлаан тымныйыыта бүөмнээн олорон суруйарын ордорор эбит.
Айымньы суруйа сылдьан сюжет тохтоон хаалар түгэнигэр хайдах гынабын диэн эдэр ааптар ыйытыытыгар маннык хоруйдаатылар: Данил Николаевич суруйарын тохтотон, кэнэҕиски бириэмэнэн төннөн ыксаабакка салҕыыр эбит. Анна Егоровна биллэр суруйааччы, ытык кырдьаҕас Николай Уус ньыматын кэпсээтэ: кини тохтотон баран, атын айымньыга көһөр, оннук гынан Николай Федорович үс романы тэҥҥэ суруйан турардааҕын кэпсээтэ.
Көрсүһүү бэрт тэтимнээхтик уонна истиҥник ааста, суруйааччыллар «Көрдөөх оонньууга» кыттан ким түүнүн утуйбакка айымньытын суруйбутун, уонна кинилэр айымньыларынан киинэ устуохтарын баҕаралларын биллэрдилэр. Маны таһынан ааҕааччылар видеоыйытыктарыгар эппиэттээтилэр. Эрэллээх ытык ааҕааччыбыт Петр Николаевич Исаев библиотека үлэһиттэригэр барҕа махталын, суруйаачыларга айар үлэлэригэр ситиһиини диэн бастыҥ баҕа санаатын тириэртэ.
Суруйааччылар айымньыларын геройдара, киэҥник уонна арылхайдык арыллар сытыы тиэмэлэрэ норуот тапталын, дьон-сэргэ тылыгар-өһүгэр ситимнэнэн сылдьара бу көрсүһүү дакаастаата.
