Н.Д. Неустроев аатынан SMART-библиотекаҕа тохсунньу ыйга төрөөбүт биллиилээх дьоммут туһунан библиотека уруоктара ыытылыннылар, кинигэ быыстапкалара туруоруллуннулар.
Тохсунньу 16 күнүгэр РСФСР норуодунай худуоһунньуга, П.А. Ойуунускай аатынан Судаарыстыбаннай бириэмийэ лауреата, Арассыыйа Худуоһунньуктарын академиятын чилиэн-кэрэспэндьиэнэ, Арассыыйа Худуоһунньуктарын сойууһун чилиэнэ, Саха Өрөспүүбүлүкэтин Духуобунаһын академиятын академига Афанасий Петрович Мунхалов төрөөбүтэ 90 сылыгар аналлаах «Народный художник Афанасий Мунхалов» диэн тиэмэҕа Глобальнай үөрэхтээһин киинин 4-с кылааһын үөрэнээччилэригэр библиотека уруога буолан ааста. Оҕолор худуоһунньук олоҕун, айар үлэтин кытта билистилэр. «Афанасий Петрович Мунхалов. Десять репродукций» кинигэттэн худуоһунньук уруһуйдарын көрдүлэр, санаа атастаһан ырытыстылар. Хартыыналаргар, айымньы нөҥүө туох санааҕа кэлбиттэрин сүрдээҕин астына кэпсэттилэр. Оҕолор бары олус көхтөөхтүк кытыннылар, саха норуотун историятын көрдөрөр, кэпсиир хартыыналары сөбүлээтилэр.
Саха дьахталларыттан биир бастакы суруйааччы, РСФСР уонна САССР култууратын Үтүөлээх үлэһитэ, ССРС Суруйааччыларын сойууһун чилиэнэ Анастасия Саввична Сыромятникова төрөөбүтэ 110 сылыгар Сайдыс - оҕону сайыннарар киин үөрэнээччилэригэр «Дьэдьэннээх халдьаайы» диэн библиотека уруога ыытылынна уонна «Күөх дуолум барахсан» кинигэ быыстапката туруорулунна. Оҕолор суруйааччы олоҕун туһунан иһиттилэр, айымньыларын кытта билистилэр. Анастасия Сыромятникова оҕолорго аналлаах «Хопто» кэпсээнин дорҕоонноохтук аахтылар. Кэпсээҥҥэ суруллубут Хопто диэн ааттаах таба оҕотун олус аһыннылар, бэйэлэрин дьиэтээҕи ыттарын, куоскаларын, кыылларын онно сыһыары тутан кэпсээтилэр.
Ити курдук, библиотека саха суруйааччыларын, ускуустуба, култуура эйгэтин биллэр-көстөр, киэн туттар дьоммутун үүнэн эрэр күлүөнэҕэ кэпсиир, сырдатар, көрдөрөр-иһитиннэрэр үлэтин тиһигин быспакка ыытар.
