Саха аныгы литературатыгар саҥа ааттар, сонун айымньылар күн бүгүн тиһигин быспакка айыллан тахсан иһэллэр. Ол курдук, Борис Павлов «Кэмҥин түһэн биэримэ» кинигэтэ сонун айымньы буолан, ааҕааччы интэриэһин тута ылар.
Суруйааччы, суруналыыс, поэт, кинигэ таһаарааччы, Арассыыйа суруйааччыта уонна уопсастыбаннай диэйэтэлэ Василий Белов аатынан Бүтүн Арассыыйатааҕы бириэмийэ лаурета - Борис Павлов «Кэмҥин түһэн биэримэ» сэһэнэ 2022 сыллаахха бэчээттэнэн, киэҥ араҥаҕа тахсан, дьон-сэргэ кутун сүүйбүтэ. Бу кинигэҕэ автор бэйэтин көлүөнэтин олоҕун туһунан аһаҕастык, уус-ураннык кэпсиир. Уларыта тутуу кэмигэр устудьуоннар, эдэр дьон олоҕо айымньы сүрүн тиэмэтинэн буолар. Манна көстөр: олох уларыйыыта, саҥа кэм кэлиитэ, бобуу-хаайыы, дьон өйүн-санаатын уһуктуута.
Айымньы дьоруойдара - ХХ үйэ дьалхааннаах уларыйыытын, Сэбиэскэй сойуус ыһыллыытын кэмигэр устудьуоннаабыт, үөрэммит эдэр дьон дьылҕата көстөр.Сэһэн тутула 17 чаастан турар, ол онно биһиги дьоруойдарбыт тустарынан сиһилии билсэбит – кинилэр хайдах олохтоохторуй, эдэр эрчимнээх устудьуоннар, атахтарыгар туран эрэр дьон олохторо хайдах эбитий? Айымньы саҕаланыытыгар Сэргэлээх тэбэр сүрэҕэр уйаларын оҥостубут эдэр оҕолору кытта билсэбит. Ол курдук, Татыйык – СГУ-га омук тылыгар үөрэнэр устудьуон. Гера – художественнай училищены бүтэрэн, Москватааҕы Суриков аатынан үнүстүүткэ үөрэнэ киирээри сылдьар эдэр киһи. Эркин – оһуокайга сылдьыбыт, тутуу дьыалатыгар үөрэммит уол. Техас Гаанньа – атыынан эргинэр, фарсовщик. Тимир – үөрэҕин бүтэрэн, саҥа үлэлээн эрэр суруналыыс. Биэс эдэр оҕо – биэс араас дьылҕа. Кинилэри иннилэригэр туох күүтэрий? Ааптар дьоруойдарыгар олох олорорго, көнө суолу буларга, быыһанарга кыах биэрэр. Бу кини – бэйэтин көлүөнэтигэр эрэлин, тапталын туоһута буолар.
Ити курдук, Борис Иванович Павлов «Кэмҥин түһэн биэримэ» сэһэнин сааһыттан тутулуга суох, бары ааҕалларыгар сүбэлиибин. Бу сэһэн ураты тыыннаах уонна оччотооҕу олоҕу кырдьыктаахтык ааҕааччыга тириэрдэр.
Статью подготовила: Айсена Иванова
