От - мас силигилиир, сайыҥҥы күн муҥутаан уһуур кэмэ, сахаларга олус күүтүүлээх кэм. Саха айылҕа оҕото буоларын быһыытынан, айылҕаны кытта муҥутуурдук чугасаһар. Улуу Тунаҕы, эбэтэр сайыҥҥы күн туруутун көрсө той, ол эбэтэр бырааһынньык тэрийэллэр, олортон саамай улахан суолталааҕынан самаан сайыны уруйдуур бырааһынньыгынан Ыһыах буолар.
Бэс ыйын 21 күнүгэр Тулагы-Киллэм күүтүүлээх, норуот үгэһин, сыаннаһын бөҕөргөтөр сыаллаах, ытык-мааны ыалдьыттардаах, сайыны көрсө Ыһыах ыстылар. Түһүлгэҕэ туптэ буруота тунаарыйда, ыҥырыылаах ыалдьыттары нэһилиэк баһылыга Е.Г.Попов арыаллаан киирдэ. Ыһыах биир тутаах туома- алгысчыт Айыылартан көрдөһөн сири – дойдуну алгыыр, ыраастыыр. Алгыс түһэн, ытык аһынан алаадьынан күндүлээн, онтон саха омук саамай тэнийбит, дьону түмэр бастыҥ үҥкүүтэ- оһуокай буолла. Ол кэннэ түһүлгэлэринэн араас тэрээһиннэр, кэнсиэрдэр, күрэхтэһиилэр ыытылыннылар.
Библиотека быйыл аан маҥнайгытын түһүлгэлэнэн, сахалыы астаах сандалы остуол, үгэс буолбут өбүгэ оонньууларын: хабылык, хаамыска, тырыынка; ыһыах тематыгар уонна А.Я.Уваровскайга аналлаах кинигэ быыстапкаларын туруоран, хас биирдии ыалдьыкка Афанасий Яковлевич кинигэлэринэн куар кодтаах кинигэ закладкатын бэлэхтээн дьон- сэргэ интириэһин тарта. Ону таһынан библиотека ааҕааччыларын ватсап группатыгар кулун тутар 7 күнүттэн бэс ыйын 13 күнүгэр диэри 4 ый устата тургутук оонньуулары бочуоттаах сынньаланҥа олорор коллегабыт Е.М.Готовцева иилээн - саҕалаан, барыта 21 онньууну ыытан, онно 14 ааҕааччы кыттан, бириис тутан ааҕааччыларбыт үөрдүлэр -көттүлэр. Тургутуктар араас темалаахтар, сахалыы тылынан, үксэ төрөөбүт дойдубут, уус уран литератураҕа, бэлиэ күннэргэ, саха тылыгар, угэһигэр, культураҕа сыһыаннаах ыйытыктартан хомуллубут. Оонньуубут кэтэһиилээх түмүктэрэ бу курдук буолла:
3с миэстэҕэ 12 оонньууга кыттан, 97 балл хомуйан Анна Петровна Сазонова таҕыста.
2с миэстэҕэ 19 оонньууга ис сүрэҕиттэн кыһаллан кыттан, 158 балл хомуйан Галина Николаевна Сидорова буолла
1кы миэстэ бэриллэр 21 оонньууттан 20 тургутугу ситиһиилээхтик ааспыт, 170 балл Матрена Васильевна Тирютина.
Тургутукка спонсордаабыт дьоммутугар «Аверс» маҕаһыын салайааччытыгар В.В. Захаровка уонна ааҕааччыбытыгар Н.Н.Сатыроваҕа барҕа махтал буолуохтун. Ити курдук ааҕааччыларбыт сүргэлэрэ көтөҕүллэн, арчыланан, алгыстанан, үөрэн-көтөн бэйэлэрин баҕа санааларын үллэһиннилэр:
«...Библиотекарь кыргыттарбытыгар барҕа махтал наһаа бэккэ туһулгэлэрин тэрийэн, остуол тардан кыттыбыт дьонно болҕомтолоохтук сыһыаннаһан грамоталары, бэлэхтэри туттартаан, онон Александраҕа, Вероникаҕа, Лариса Лазаревнаҕа улахан махталларын», - ааҕааччыбыт М.Е.Дегтярева
«..Библиотека урукку , билиҥҥи үлэһиттэригэр барҕа махталбын билинэбин. Хата эһиги испииһэктээн онно ол түһүлгэҕэ кэлээриҥ диэн ыҥыраҥҥыт ыһыахха сырыттым,»- Г.Н.Сидорова
Арассыыйа Дьиэ кэргэн, Саха сиригэр Оҕо , Тулагы-Киллэм нэһилиэгэр Ийэ сылларыгар аналлаах ыһыаҕын «Кэскиллээх түһүлгэ» диэн номинацияҕа тиксэн үөрүүбүт үксээн, ыһыах күнүн түмүктээбиппит.
