“Мир приключений” бибилэтиэкэ бу күннэргэ ааҕааччыларыгар анаан араас интэриэһинэй тэрээһиннэри тэрийдэ.
Ол курдук сэтинньи 28 күнүгэр биһиги библиотекабыт Н.Е. Мординов – Амма Аччыгыйа аатынан “Кэскил” оҕо бэчээтин кыһататын кытта ZOOM былаһааккаҕа үтүөнү оҥорор сыаллаах “Алиса в стране чудес в стиле аниме” диэн уруһуй маастар-кылааһын тэрийдэ.
“Чуораанчык” сурунаал стилист - редактора Надежда Сидорова маастар-кылааһын хаамыыларынан республикабыт араас улуустарыттан уонна оскуолаларыттан 67 оҕо Л.Кэрролл «Алиса в стране чудес» кэпсээниттэн биллибит Алисаны аниме истиилинэн уруһуйдуурга холоннулар. Үтүө санаа тэрээһинигэр холбоспут оҕолор түргэнник өйдүү-ылына охсон ким илиискэ, ким анал графическай планшекка уруһуйдаабыт үлэлэрэ талыллан «Кэскил» уонна «Юность Севера» хаһыаттарга бэчээттэннилэр.
Маастар-кылааска киирбит үбүнэн “Кэскил” оҕо бэчээтин кыһата Национальнай медицинэ киинигэр оҕо салаатын иһинэн үлэлиир “Солнечный город” реабилитационнай кииҥҥэ бэйэтин хаһыаттарыгар уонна сурунаалларыгар 2021 сыл икки аҥаарыгар босхо сурутууну бэлэхтээтэ.
Сэтинньи ый, саха итэҕэлинэн, Байанай ыйа. Ол чэрчитинэн ааҕааччыларбытыгар булт умсулҕаннаах түгэннэрин көрдөрөр «Байанай бэлэ5э» хаартыска куонкурса буолан ааста. Куонкурус сүрүн спонсора «Байанай» сурунаал дьүүллүүр сүбэтэ кыайыылаахтары ааттаан бириис олохтообута.
Ол курдук, улахан дьоҥҥо Иван Леонтьев Хаҥалас улууһуттан, оҕолорго Семен Кузьмин Горнай улууһуттан кыайыы үөрүүтүн биллилэр.
Кырыа кыһыны көрсө “Якутск – столица зимы” акция чэрчитинэн «Зимняя сказка» дорҕоонноохтук ааҕыы күрэҕин биллэрбиппит. Курэхпит сыала-соруга дьиэ-кэргэнинэн ааҕыыны көҕүлээһин этэ. Күрэхпитигэр Кэбээйиттэн, Чурапчыттан, Хаҥаластан уонна Дьокуускайтан оҕолор, эдэр ийэлэр кыттыыны ыллылар. Бу күрэхпитигэр сүрүннүүр спонсор Автодорожнай уокурук Управленията буолбута.
Дьүүллүүр сүбэ быһаарыытынан Дьокуускай куораттан эдэр ийэ Саргылана Гуляева уонна оҕолорго Сайина Васильева кыайыылааҕынан ааттаннылар.
Кыттааччыларга уонна спонсордарбытыгар махталбытын тиэрдэбит.
