Үгүс ааҕааччы кутун туппут суруйааччы Татьяна Находкина бу күннэргэ 70 сааһын бэлиэтээтэ. Кини билиҥҥи олох, оҕо, ыччат туһунан тэттик кэпсээннэрэ, сэргэх сэһэннэрэ эрэл кыымнаахтар, сырдыгы, кэрэни түстүүллэр. Ааптар доҕордоһуу, таптал, бэйэ-бэйэҕэ сыһыан нөҥүө сиэр-майгы араас түгэннэрин сытыытык туруорар, дьон психологиятын арыйар, ону сэргэ социальнай кыһалҕалары таарыйар.
Төрөппүт уонна оҕо сыһыанын, дьиэ-кэргэн иһинээҕи атмосфераны арыйар олус чараас тиэмэ. Бу туһунан суруйар даҕаны улахан хорсун быһыы. Татьяна Петровна бу тиэмэни дьиҥ-чахчы баарынан арыйар. Билиҥҥи кэмҥэ улаатан эрэр оҕоҕо болҕомтото суох сыһыан дьиэ кэргэҥҥэ уустук, ыарахан түгэннэри аҕалара кистэл буолбатах. Ол туһунан «Тыалынан киирбит холоругунан тахсар» диэн кинигэҕэ ааҕыаххытын сөп.
«Ытыырын быыһыгар кыыс туманнырбыт хараҕар: ийэтэ, кылааһын салайааччыта, бииргэ үөрэнэр оҕолоро элэҥнээн көһүннүлэр. «Тоҕо ийэм тылын истибэтэхпиний? Барыма дии сатаабыта. Кылааһым салайааччыта Анна Иннокентьевна үөрэххэр кыһан диэн төһөлөөх этэ сатаабытай?» Онтон уон биир сыл бииргэ үөрэммит оҕолоро кэлэйбиттии көрбүт харахтара… бу баарга дылылар»… («Тыалынан киирбит холоругунан тахсар» кэпсээнтэн).
Бу кэпсээҥҥэ сиэри таһынан атаахтаан улааппыт кыыс, үрдүк дуоһунаска үлэлиир улахамсык ийэ өйдөспөтөх сыһыаннарыттан улахан иэдээн тахса сыһар. Ол эрээри ийэ сүрэҕэ таайан, сыыһатын өйдөөн оҕотун быыһыыра ааҕааччыны үөрдэр.
Маны таһынан кинигэҕэ «Төлкөбүт төннүбэтин» сэһэн, «Биэнсийэ» диэн кэпсээннэр киирбиттэр.
Ааҕа олорон сонньуйан ылаҕын. Олохпут хайдах баарынан ойууламмыт. Куруутун үлэҕэ умса түспүт төрөппүт, туох да харысхала суох, бу уустук олоххо саҥа үктэммит оҕолорбут, оскуола олоҕо, дьон араас майгыта… Айымньылар толкуйдаталлар…
Кинигэ улахан кылаас оҕолоругар ананар. Төрөппүттэргэ, учууталларга, социальнай үлэһиттэргэ олус наадалаах кинигэ. Ырытыһыыны, аһаҕас кэпсэтиини ирдиир айымньылар.
Кинигэни биһиги библиотекабытыттан кэлэн уларсан ааҕыаххытын сөп.
Татьяна Сидорова
