Көрөөччү үрдүк сыанабылын ылбыт, киэҥ экраҥҥа тахсыбыт «Карина» киинэни көрбөтөх киһи аҕыйах буолуо. Онно сүрүн оруолу толорбут - кырачаан артыыс Прибылых Софияттан уонна кини ийэтэ Евдокия Борисовнаттан кылгас интервью ыллыбыт.
- Үтүө кунүнэн, киинэ күн сирин көрбүтүнэн эҕэрдэлээн туран София бу киинэ эйгэтигэр хайдах кэллэ диэн ыйытыахпыт этэ.
- (Ийэтэ эппиэттиир) Аан бастаан кастинг туһунан интернет ситимигэр көрбүппүт уонна билэр дьоммут “Софияны ыытан көрбөккүт дуо?” диэн сүбэлээбиттэрэ. Бастаан видео устан уонна хаартыскаларын ыыппыппыт. Онтон биир ыйынан кастинг бастакы этапыгар ыҥырбыттар, уопсайа 3 этаптаах кастинг этэ. Онтон ыам ыйын бүтэһигэр Софияны таллыбыт диэн эппиттэрэ, ол кэмҥэ 4,5 саастааах этэ.
Оонньуур дьоҕурдаах оҕону булуу – уустук сорук. Бу оруолга Софияны 328 оҕоттон кастиннаан талбыттар
- Киинэҕэ уһуллар диэн төһө ыарыхан эбитий?
- (София эппиэттиир) Наһаа ыарыхан буолбатах этэ, Марианна (Марианна Сиэгэн - режиссер, продюсер) миэхэ көмөлөспутэ, уонна “Art Doydu” кинокомпаниян бары көмөлөһөллөр этэ, миэхэ бары эдьиий, убай курдуктар этэ.
- Съемка кэмиттэн саамай тугу өйдөөн хааллын?
- (София эппиэтиир) Саамай интириэһинэй миэхэ муоста анныгар этэ, онно утуйбутум. (Ийэтэ эппиэттиир) Наар уһуллуута айылҕаҕа буоллаҕа дии, күн аайы халлаан туруга уларыйар, сороҕор күннээх, сороҕор ардахтаах да күннэр бааллар этэ. София онно походтуу сылдьар курдук сананар этэ.
Киинэни түбэлтэ буолбут сириттэн, Оломтон, 18 килэмиэтир эрэ тэйиччи сытар Быһыктаах диэн сиргэ устубуттар, онон айылҕата эмиэ чопчу дьүөрэлэһэр.
- София улаатаххына ким буолуон этэй?
- (София эппиэтиир) Мин улааттахпына артыыс буолуохпун баҕарабын уонна элбэх да элбэх сиргэ айанныахпын баҕарабын. Ол мин мечтам!
- Киинэ премьератын кэннэ туох дии санаатын?
- (София эппиэтиир) Киинэни көрөн баран эдьиий Машам (Мария Кычкина – в роли матери Карины) наһаа үчүгэйдик уһуллубут дии санаатым, уонна бары убайдарым эмиэ наһаа үчүөйдэр. Кинокомпания бары бииргэ үлэлээбиттэригэр, наһаа үчүгэй киинэ тахсыбыт. Марианна Сиэгэҥҥэ махтал!
Дьиҥнээх олоххо буолбут түгэни кэпсиир киинэ, онон туох эрэ дьикти, соһутар түмүгэ суох, саҕаланыытыттан бүтэһигэр диэри биллэр ис хоһоонноох. Ол да буоллар, олус сатабыллаахтык суруллубут сценарий, астык режиссура киинэ бүтүөр диэри көрөөччү болҕомтотун экрааҥҥа хам хатыыр.
- София кинигэ төһө ааҕаҕыный? Ханнык кинигэлэри ордороҕун?
- (София эппиэтиир) Мин ийэм үксүн сахалыы кинигэлэри атыылаһар. Мин бэйэм кинигэлэри сөбүлүүбүн, ийэм үлэтиттэн кэллэҕинэ киэһээ иккиэн ааҕабыт.
- Библиотека ааҕааччыларыгар тугу баҕарыан этэй?
- Эппиэтин видеоҕа көрүн
Эппиэттэргит иһин махталбытын тиэрдэбит уонна өссө да үрдүк ситиһиилэри баҕарабыт!
Туһаныллыбыт литература
Карпов, Е. Дьиҥ олохтон киинэ / Егор Карпов // Саха сирэ. – 2024. – Муус устар 12 к. – С. 14.
